16 აგვისტოდან შეერთებული შტატების უდიდეს ქალაქი ნიუ იორკში ახალი კოვიდრეგულაციები ამოქმედდება.
ნიუ იორკის მერის, ბილ დე ბლაზიოს განცხადებით, რესტორნების, ბარების, ხალხმრავალი ღონისძიებებისა და ფიტნესკლუბების ვიზიტორებს, შენობაში შესაღწევად, ვაქცინაციის დამადასტურებელი დოკუმენტის წარდგენა დასჭირდებათ.
ზემოთაღნიშნული დაწესებულებები ვიზიტორებისგან ვაქცინაციის დოკუმენტის წარდგენას 16 აგვისტოდან მოითხოვენ. ქალაქის ხელისუფლება რეგულაციის აღსრულების პროცესის მონიტორინგს 13 სექტემბრიდან შეუდგება.
"ნიუ-იორკი გახდება აშშ-ის პირველი ქალაქი, სადაც მოთხოვნილი იქნება ვაქცინაციის დამადასტურებელი მოწმობა. ასეთი ზომების შესაძლებლობას მოგვცემს, ვირუსს უფრო ეფექტურად ვებრძოლოთ", - განაცხადა ბილ დე ბლაზიომ.
მსგავსი მოთხოვნები დაინერგება სპორტული დარბაზებში, თეატრებსა და კინოთეატრებში, გასართობ კომპლექსებში.
"თუ თქვენ არ ხართ აცრილი, მაშინ, სამწუხაროდ, ვერ შეძლებთ რომელიმე მათგანის მონახულებას", - დასძინა დე ბლაზიომ.
კორონავირუსთან ბრძოლის დამატებით ზომების მიღების საჭიროება ვირუსის დელტა ვარიანტის გავრცელებამ განაპირობა. ამერიკის დაავადებათა კონტროლის ცენტრის თანახმად, ქვეყანაში აქტიური ვირუსული ინფექციების 83% სწორედ დელტა ვარიანტზე მოდის.
CDC-ის ინფორმაციით, შესაძლოა, აცრილი ადამიანებიც კი დაინფიცირდნენ დელტა ვარიანტით და გახდნენ მისი გამავრცელებლები. ამ ფონზე, CDC გამოვიდა რეკომენდაციით, ვაქცინაციის სტატუსის მიუხედავად, შიდა სივრცეებში აღდგეს პირბადის ტარების ვალდებულება.
