მტკიცებულებათა უმეტესობა ცხადყოფს, რომ ვირუსმა, რომელმაც COVID-19-ის პანდემია გამოიწვია, ჩინეთის კვლევითი ლაბორატორიიდან გაჟონა. ამის შესახებ ნათქვამია ამერიკელი რეპუბლიკელი კონგრესმენების ანგარიშში, რომელიც დღეს გამოქვეყნდა.
საერთაშორისო სააგენტო Reuters-ი, რომელიც კონგრესმენთა ანგარიშს ავრცელებს, აღნიშნავს, რომ ეს ინფორმაცია აშშ-ის დაზვერვის სააგენტოებს ჯერ არ დაუდასტურებიათ.
როგორც კონგრესმენთა მოხსენებაში წერია, უამრავი მტკიცებულება ადასტურებს იმას, რომ უხანის ვირუსოლოგიის ინსტიტუტის მეცნიერ-თანამშრომლები კორონავირუსების მოდიფიცირებაზე, ადამიანთა ინფიცირებისთვის, მუშაობდნენ. ამასთან, აღნიშნულია, რომ მსგავსი ცდები ფარულად მიმდინარეობდა.
უხანის ვირუსოლოგიის ინსტიტუი ჩინეთისა და ამერიკის შეერთებული შტატების მიერ გამოყოფილი სახსრებით ფინანსდება.
კონგრესის წარმომადგენელთა პალატის წამყვანმა რესპუბლიკელმა წევრმა, მაიკლ კოლმა, რომელიც ამ გამოძიებას და ანგარიშის მომზადებას მეთაურობდა, კორონავირუსის პანდემიის წარმოშობის შესახებ ორპარტიული გამოძიების ჩატარება მოითხოვა.
პეკინი კატეგორიულად უარყოფს ყოველგვარ მოსაზრებას ლაბორატორიაში ვირუსის მოდიფიცირებასთან, მის გაჟონვასთან და ამ ინფორმაციის საზოგადოებისთვის დამალვასთან დაკავშირებით.
ზოგიერთ ექსპერტი ვირუსის წარმოშობას ბუნებრივი მიზეზებით ხსნის და აცხადებს, რომ იგი ადამიანებს შორის უხანის ცხოველთა ბაზრიდან გავრცელდა.
"ახლა ჩვენ მტკიცედ გვწამს, რომ დროა, სრულად გამოვრიცხოთ ცხოველების ბაზარი, როგორც ვირუსის გავრცელები წყარო. ვფიქრობთ, მტკიცებულებათა უმეტესობა ადასტურებს, რომ ვირუსმა უხანის ვირუსოლოგიის ინსტიტუტიდან გაჟონა და რომ ეს 2019 წლის 12 სექტემბრამდე მოხდა", - აღნიშნულია ანგარიშში.
ანგარიშში ასევე მითითებულია ახალი ინფორმაცია, რომელიც ამ დრომდე უცნობი იყო. კერძოდ, საუბარია ლაბორატორიის უსაფრთხოების პროტოკოლებზე. როგორც ირკვევა, 2019 წლის ივლისში ლაბორატორიამ სახიფათო ნარჩენების გადამუშავების სისტემისთვის,რომელიც ორ წელზე ნაკლები ვადისა იყო, 1.5 მილიონი დოლარი მოითხოვა.
2021 წლის აპრილში, აშშ-ის სადაზვერვო სააგენტომ განაცხადა, რომ იგი იზიარებდა მეცნიერთა ვარაუდს, რომლითაც კორონავირუსის წარმოშობა ბუნებრივი მიზეზებით იყო ახსნილი.
ჯანმრთელობის მსოფლიო ორგანიზაციის მიერ ჩატარებულ გამოძიების პირველ ეტაპზე, სარწმუნოდ მიიჩნევდნენ ვერსიას, რომ კორონავირუსი ცხოველური წარმოშობისა იყო. ორგანიზაცია უარყოფდა ვერსიებს, რომ შესაძლოა ვირუსი ლაბორატორიიდან გავრცელებულიყო.
ჯანმრთელობის მსოფლიო ორგანიზაციამ მარტში გამოაქვეყნა უხანის ლაბორატორიაში წარგზავნილი საერთაშორისო ექსპერტების ანგარიშის სრული ვერსია. ანგარიშის თანახმად, SARS-CoV-2-ის გაჟონვა ლაბორატორიიდან უკიდურესად ნაკლებსავარაუდო იყო.
ჯანმრთელობის მსოფლიო ორგანიზაციის (WHO) ხელმძღვანელმა, თედროს ადანომ ღებრეიესუსმა, ივნისში აღიარა, რომ ვერსია ვირუსის ჩინეთის ლაბორატორიიდან გაჟონვასთან დაკავშირებით ძალიან ადრე გამოირიცხა.
მანამდე გავრცელდა ცნობა, რომ ბრიტანეთი ვირუსის ლაბორატორიიდან გავრცელების ვერსიას შესაძლებლად მიიჩნევდა.
მიმდინარე წლის მაისში აშშ-ის პრეზიდენტმა ჯო ბაიდენმა დაავალა აშშ-ს სადაზვერვო სააგენტოებს "გაორმაგდეს ძალისხმევა" კორონავირუსის წარმოშობის წყაროს დასადგენად.