ბრიტანეთის შეიარაღებულმა ძალებმა გახსნეს პირველი კოსმოსური სარდლობის ცენტრი ჰაი უიკომის საჰაერო ძალების ბაზაზე.
ცენტრი გაერთიანებული სამეფოს ინტერესებს დაიცავს კოსმოსურ სივრცეში.
სარდლობის ცენტრის გახსნა ხუთშაბათს გაიმართა. ცენტრის პირველმა 8 თანამშრომელმა მიიღო სპეციალური უნიფორმა და "კოსმოსური ოპერატორის" სამკერდი ნიშნები.
ცენტრის გახსნა არის საინვესტიციო პროგრამის ნაწილი, რომელიც პრემიერ -მინისტრმა ბორის ჯონსონმა გასული წლის ნოემბერში გამოაცხადა.
შემდეგი ოთხი წლის განმავლობაში, ბრიტანეთის თავდაცვის დეპარტამენტი ცენტრის სრულყოფილი ფუნქციონირებისთვის საკუთარი ბიუჯეტიდან 16 მილიარდ ფუნტს გაიღებს.
კოსმოსის დაცვა არის საინვესტიციო პროგრამის ერთ-ერთი პრიორიტეტი.
"რადგან ჩვენი მეტოქეები აძლიერებენ თავიანთ კოსმოსურ შესაძლებლობებს, მნიშვნელოვანია, რომ ჩვენ შევინარჩუნოთ გადამწყვეტი საბრძოლო უპირატესობა ამ სწრაფად განვითარებადი სივრცეში," - განაცხადა თავდაცვის მდივნის მოადგილემ ჯერემი ქუინმა სარდლობის ცენტრის გახსნის ცერემონიაზე.
ბრიტანეთის საჰაერო ძალების უფროსმა მაიკლ ვიგსტონმა, ბრიტანეთის მთავარ მეტოქეებად რუსეთი და ჩინეთი დაასახელა.
მისი განცხადებით, რუსეთი და ჩინეთი ანტისატელიტურ იარაღებს ცდიან, რომლებიც კოსმოსში განთავსებული სატელიტების წინააღმდეგ არის მიმართული, რაც შემაშფოთებელია და საერთაშორისო საზოგადოებამ ყურადღება უნდა გაამახვილოს ამ საკითხზე.
ცენტრის შემადგენლობაში ბრიტანეთის სამხედრო საჰაერო ძალების ექვსი ოფიცერი და აშშ-ის არმიის ერთი ოფიცერი შედიან. ცენტრის ხელმძღვანელად ავიაციის ვიცე-მარშალი, პოლ გოდფრი დაინიშნა.
ბრიტანეთის სამხედრო და სამოქალაქო ლიდერების განცხადებით, კოსმოსური სარდლობის ცენტრი არ იქნება ორიენტირებული კოსმოსში იარაღების გამოცდაზე და იგი განსაკუთრებულ ყურადღებას პოტენციური საფრთხეების თვალყურის დევნებას დაუთმობს.
შეერთებულმა შტატებმა კოსმოსური ძალები 2019 წლის ბოლოს დააფუძნა.
