ჯამრთელობის მსოფლიო ორგანიზაციის გენერალური დირექტორის, ტედროს ადანომ ღებრეიესუსის განცხადებით, მსოფლიოში კორონავირუსთან ბრძოლის მიღწევები საფრთხის ქვეშაა.
"ჯანმო-ს ექვსი რეგიონიდან ხუთში, COVID-19- ით ინფიცირების მაჩვენებელი გასული ოთხი კვირის განმავლობაში 80 პროცენტით გაიზარდა, ანუ თითქმის გაორმაგდა. აფრიკაში სიკვდილიანობა 80 პროცენტით გაიზარდა", - თქვა ღებრეიესუსმა.
ჯანმრთელობის მსოფლიო ორგანიზაციის გენერალური დირექტორის თქმით, ვითარების გამწვავება მეტწილად დელტა ვარიანტის გავრცელებით არის გამოწვეული და განპირობებულია იმითაც, რომ ადამიანებმა კვლავ დაიწყეს ერთმანეთთან აქტიური ფიზიკური კომუნიკაცია, თანაც ისე, რომ სიფრთხილის ზომებს უგულვებელყოფენ.
"რთულად მოპოვებული წარმატებები შესაძლოა, საფრთხის წინაშე აღმოჩნდეს ან დაიკარგოს, ხოლო ბევრ ქვეყანაში ჯანდაცვის სისტემები გადაიტვირთოს", – განაცხადა ტედროს ადანომ ღებრეისუსმა პრესკონფერენციაზე.
მისივე თქმით, მსოფლიოში შექმნილია სამედიცინო აღჭურვილობის მწვავე დეფიციტი, განსაკუთრებით დრამატულ შედეგებს კი პაციენტებისთვის ჟანგბადის ნაკლებობა იწვევს.
პანდემიის დაწყებიდან დღემდე მსოფლიოში დაფიქსირებულია კორონავირუსით ინფიცირების 196 მილიონი შემთხვევა, რომელთაგან თითქმის 4.2 მლნ ფატალურად დასრულდა.