ჩინეთში ტაიშანის ატომური ელექტროსადგურის ერთ-ერთი რეაქტორი დახურეს მას შემდეგ, რაც ბირთვული საწვავის ღეროები დაზიანდა.
გუანდუნის პროვინციაში მდებარე ატომური ელექტროსადგურის ოპერატორი კომპანიის განცხადებით, რეაქტორის დახურვა ტექნიკოსებთან ხანგრძლივი მოლაპარაკებების შედეგად გადაწყდა.
ჩინეთის "გენერალური ბირთვული ენერგიის ჯგუფის" განცხადებით, რეაქტორი მთლიანად კონტროლის ქვეშ არის მოქცეული. მათივე ცნობით, იგეგმება დაზიანების მიზეზების დადგენა და საწვავის ღეროების ახლით ჩანაცვლება.
საწვავის ღეროები დალუქული ლითონის მილებია, რომლებშიც გადის ბირთვული მასალები, რასაც ბირთვული რეაქტორის საწვავად იყენებენ.
ატომური ელექტროსადგურის რეაქტორის დახურვას წინ უსწრებდა ცნობა, ელექტროსადგურზე არსებული გაჟონვის შესახებ.
ამ წლის 15 ივნისს, ტელეკომპანია CNN-ი იუწყებოდა, რომ აშშ-მა მიიღო ინფორმაცია ჩინეთში ტაიშანის ატომურ ელექტროსადგურზე რადიოლოგიური საფრთხის შესახებ.
მედიის ინფორმაციით, გარდაუვალი რადიოლოგიური საფრთხის შესახებ ინფორმაცია გავრცელდა ფრანგული კომპანია Framatome-გან, რომელიც ნაწილობრივ მონაწილეობს ტაიშანის ატომური ელეტქროსადგურის ფუნქციონირებაში.
Framatome-ს წერილში ნათქვამი იყო, რომ ჩინურმა მარეგულირებელმა გაზარდა რადიაციის დასაშვები ზღვარი ატომური ელეტროსადგურის მიღმა, რათა ობიექტის დახურვა თავიდან აეცილებინა.
ტაიშანი მსოფლიოში პირველი ატომური ელექტროსადგურია, რომელსაც EPR ტიპის რეაქტორები აქვს.
EPR (European Pressurized Reactor) “ევროპული წნევის ქვეშ მყოფი რეაქტორი" - მესამე თაობის ბირთვული რეაქტორი.
მსგავსი რეაქტორების მქონე ატომური ელექტროსადგურების აგება იგეგმება ფინეთში, საფრანგეთსა და დიდ ბრიტანეთში.