ბელარუსის პრეზიდენტის ალიაქსანდრ ლუკაშენკას განცხადებით, ქვეყანა იბრძვის არა განსხვავებული აზრისა და შეხედულებების, არამედ სიტყვის თავისუფლების წინააღმდეგ, რომელიც "ექსტრემისტულ საქმიანობაში გადაიზარდა".
ლუკაშენკას თქმით, მთავრობა უკვე ასრულებს სისტემურ სამუშაოებს ინფორმაციის ნაკადების მოწესრიგების მიზნით.
"მნიშვნელოვნია გვესმოდეს, რომ ჩვენ არ ვიბრძვით განსხვავებული აზრისა და განსხვავებული მოსაზრებების წინააღმდეგ. ღმერთმა ნუ ქნას. განსხვავებული მოსაზრებების ამოძირკვით ქვეყანა უბრალოდ გაქრება. სიტყვის თავისუფლება დღეს ექსტრემისტულ საქმიანობაში გადაიზარდა", - ციტირებს ლუკაშენკას სიტყვებს სახელმწიფო სააგენტო BelTA.
ლუკაშენკას მტკიცებით, "ერთია ხელისუფლების კრიტიკა [რომელსაც მინსკი ყოველთვის ადეკვატურად იღებდა], ხოლო მეორეა აჯანყებისა და სისხლიანი ანგარიშსწორებისკენ მოწოდება".
ცოტა ხნით ადრე, ბელარუსის მმართველმა ლუკაშენკამ განაცხადა, რომ ქვეყანა უცხოეთის არასამთავრობო ორგანიზაციებისგან უნდა "გაწმინდოს".
ლუკაშენკას განკარგულებით, ქვეყანაში 60-მდე არასამთავრობო ორგანიზაცია დაიხურა. ბოლო ინფორმაციით, ბელარუსში საქმიანობა შეწყვიტა გოეთეს ინსტიტუტმა.
ბელარუსის ხელისუფლება მასობრივად დევნის თავისუფალ მედიასა და არასამთავრობო ორგანიზაციებს. ბოლო რამდენიმე კვირაა, ბელარუსის საგამოძიებო კომიტეტი ჩხრეკას ატარებს ჟურნალისტებისა და უფლებადამცველების სახლებში. დაპატიმრებულია ათეულობით ჟურნალისტი.
გაეროს ადამიანის უფლებათა უმაღლესმა კომისარმა მიშელ ბაჩელეტმა დაგმო ბელარუსში მიმდინარე მოვლენები და მათ "გაუგონარი ანგარიშსწორება" უწოდა. მინსკის ქმედებები მედიისა და არასამთავრობო ორგანიზაციის მიმართ დაგმეს ვაშინგტონმა და ბრიუსელმა.
