ისრაელი იწყებს მოსახლეობის ვაქცინაციას "ფაიზერის" მესამე დოზით. ამის შესახებ პრემიერ-მინისტრმა, ნაფტალი ბენეტიმ განაცხადა.
კორონავირუსის საწინააღმდეგო ვაქცინის მესამე დოზით ვაქცინაცია განკუთვნილია ისრაელის მოქალაქეებისთვის, რომლებმაც მიაღწიეს 60 წელს. ამასთან, მეორე დოზის მიღებიდან გასული უნდა იყოს 5 თვე.
გამოცდის ფარგლებში 2000-მა ადამიანმა უკვე მიიღო მესამე დოზა. იუწყებიან, რომ სახიფათო გვერდითი ეფექტი არ გამოვლენილა.
მესამე დოზას საჯაროდ გაიკეთებს ისრაელის პრეზიდენტი, 60 წლის იცხაკ ჰერცოგი.
მიუხედავად იმისა, რომ ისრაელი ერთ-ერთი პირველი იყო მსოფლიოში, ვინც მოსახლეობის დიდი ნაწილი აცრა, ბოლო თვეში ინფექციების რიცხვმა იმატა. ექსპერტები ახალ ეპიდემიას უკავშირებენ ვირუსის დელტა ვარიანტის გავრცელებას.
