შეერთებული შტატების პრეზიდენტი ჯო ბაიდენი ბელარუსის ოპოზიციის ლიდერს, სვიატლანა ციხანოუსკაიას შეხვდა.
შეხვედრის ამსახველი ფოტო ბაიდენის სოციალურ ქსელში გამოქვეყნდა.
"ჩემთვის დიდი პატივი იყო დღეს დილით, თეთრ სახლში სვიატლანა ციხანოუსკაიასთან შეხვედრა. შეერთებული შტატები მხარს უჭერს ბელორუსის ხალხს დემოკრატიისა და ადამიანის უფლებების დაცვის საქმეში", - განაცხადა ჯო ბაიდენმა.
შეხვედრის შესახებ ინფორმაცია ციხანოუსკაიას ტელეგრამის არხზეც გავრცელდა. ბელარუსის ოპოზიციის ლიდერის თქმით, თეთრი სახლი დატოვა იმ რწმენით, რომ "მილიონობით ბელარუსის მოქალაქის ხმა გააჟღერა".
"მე, როგორც პოლიტიკოსი, კმაყოფილი ვარ ამ შეხვედრით. პრეზიდენტმა ბაიდენმა თქვა, რომ მსოფლიოში ავტოკრატიასა და დემოკრატიას შორის ბრძოლა მიმდინარეობს. ბელარუსი ამ ბრძოლის წინა ხაზზეა. ამიტომ, მე პრეზიდენტ ბაიდენს მოვუწოდე, დაგვეხმაროს. ბელარუსის რევოლუცია არ არის დაკავშირებული გეოპოლიტიკასთან. ეს არის ბელარუსების დემოკრატიული არჩევანი და შეერთებული შტატების ზნეობრივი მოვალეობაა დაგვეხმაროს", - თქვა ციხანოუსკაიამ.
ბელარუსის ოპოზიციის ლიდერი სვიატლანა ციხანოუსკაია ვაშინგტონში იმყოფება, სადაც ის მაღალი დონის შეხვედრებს მართავს.
სვიატლანა ციხანოუსკაია უკვე შეხვდა შეერთებული შტატების სახელმწიფო მდივანს ენტონი ბლინკენსა და მის მოადგილეს ვიქტორია ნულანდს.