ჯანდაცვის სამინისტრო გეგმიურ ოპერაციებს დროებით აჩერებს. ამის შესახებ ჯანდაცვის მინისტრმა ეკატერინე ტიკარაძემ განაცხადა.
ტიკარაძის თქმით, გეგმიური ოპერაციების შეჩერება საწოლფონდის მობილიზების აუცილებლობას უკავშირდება, რისი საჭიროებაც, თავის მხრივ, გართულებულმა ეპიდემიოლოგიურმა ვითარებამ განაპირობა.
"გეგმური ოპერაციები შეწყდა. მსგავსი დადგენილება ასევე გამოვეცით მეორე ტალღის პერიოდში, რადგან მნიშვნელოვანი არის ამ დროს ყველა საწოლი მობილიზებული იყოს პანდემიაში ჩასართავად, რომ არ იყოს ცდუნება, ჩაატარონ ოპერაციები, რომელიც მათ უნდათ და არ იყოს უარი ქვეყნის საჭიროებაზე", - განაცხადა ტიკარაძემ.
ჯანდაცვის მინისტრის განცხადებით, საწოლფონდების მობილიზებისთვის ეკონომიკის სამინისტროც მუშაობს.
"ეკონომიკის სამინისტროს მიღებული აქვს დავალება, რომ მათ უნდა გააკეთონ მობილიზაცია სასტუმროების საწოლფონდის, რათა ჩვენ შევძლოთ ადეკვატურად პაციენტების მართვა და ისინიც ამ მიმართულებით მუშაობენ", - აღნიშნა ტიკარაძემ.
შეგახსენებთ, ჯანდაცვის სამინისტრომ გეგმიური ოპერაციების დაფინანსება გასული წლის ნოემბრიდან 2021 წლის მარტამდე პერიოდშიც შეაჩერა.
