შეერთებული შტატების პრეზიდენტის ჯო ბაიდენის განცხადებით, ვლადიმირ პუტინს რეალური პრობლემები აქვს, რადგან რუსეთის ეკონომიკა სხვა არაფერია თუ არა ბირთვული იარაღი და ნავთობის ჭაბურღილები. ამის შესახებ ბაიდენმა ამერიკის სადაზვერვო საზოგადოების წინაშე სიტყვით გამოსვლისას განაცხადა.
ბაიდენის თქმით, პუტინმა იცის, რომ პრობლემები აქვს და სწორედ ეს აქცევს მას კიდევ უფრო საშიშად.
"მე შევხვდი პუტინს, რომელსაც რეალური პრობლემები აქვს. მისი ეკონომიკა ბირთვულ იარაღსა და ნავთობის ჭაბურღილზე დგას და სხვა არაფერზე. რუსეთის ეკონომიკა მსოფლიოში მერვეა - მან იცის, რომ ეს რეალურად სავალალო მდგომარეობაა, და ეს, ჩემი აზრით, მას კიდევ უფრო საშიშს ხდის", - თქვა ბაიდენმა.
პრეზიდენტმა ბაიდენმა ასევე აღნიშნა, რომ ამერიკული სპეცსამსახურები უფრო უკეთესად მუშაობენ, ვიდრე რუსული, პუტინმა კარგად იცის ამის შესახებ და წუხს ამის გამო.
ბაიდენმა ასევე აღნიშნა, რომ რუსეთი "უკვე ავრცელებს დეზინფორმაციას" აშშ-ის კონგრესის შუალედური არჩევნების შესახებ, რომელიც 2022 წლის ნოემბერში გაიმართება. ბაიდენმა რუსეთის ქმედებას "ამერიკის სუვერენიტეტის აშკარა დარღვევა" უწოდა.
