ბელარუსის საჰაერო მიმოსვლის კონტროლის სამსახურის თანამშრომელი, დისპეტჩერი ოლეგ გალეგოვი, რომელმაც Ryanair-ის თვითმფრინავს მინსკში დაშვება აიძულა, ქვეყნიდან გაიქცა.

მედიის ცნობით, გალეგოვმა ოჯახთან ერთად ბელარუსი ივლისის დასაწყისში დატოვა. 

"ბელაერონავიგაციის" თანამშრომლებმა, სადაც დისპეტჩერი მუშაობდა, ჟურნალისტებს დაუდასტურეს, რომ გალეგოვი მოულოდნელად გაქრა, გამორთო ტელეფონი და წაშალა მისი გვერდები სოციალურ ქსელებში. თავის მხრივ, "ბელაერონავიგაციამ" განაცხადა, რომ გალეგოვმა შვებულება ივნისში მიიღო და კომპანიამ "არაფერი იცის მისი სამსახურიდან წასვლის შესახებ".

23 მაისს ირლანდიური ავიაკომპანია Ryanair-ის თვითმფრინავი, რომელიც ათენიდან ვილნიუსში მიფრინავდა, მინსკის მოთხოვნის საფუძველზე, ბორტზე თითქოსდა ბომბის არსებობის გამო, იძულებული გახდა მინსკის საერთაშორისო აეროპორტში დაშვებულიყო.

მოგვიანებით გაირკვა, რომ თვითმფრინავის იძულებით დაშვება ბელარუსის ხელისუფლების განკარგულებით მოხდა, რათა დაეკავებინათ ტელეგრამ-არხ Nexta-ს დამფუძნებელი რომან პრატასევიჩი და მისი მეგობარი ქალი სოფია საპეგა.

პრატასევიჩისა და საპეგას წინააღმეგ ბელარუსის საგამოძიებო კომიტეტმა სისხლის სამართლის საქმეები აღძრა მასობრივი არეულობების ორგანიზებისა და ხელისუფლებისადმი სოციალური შუღლის გაღვივების ბრალდებით. საგამოძიებო კომიტეტმა განაცხადა, რომ დაკავებულებმა ბრალი აღიარეს.

მოგვიანებით, პრატასევიჩის "აღიარება" ბელარუსის სახელმწიფო ტელევიზიის ეთერში გავიდა, სადაც ის ამბობს, რომ წვლილი შეჰქონდა მასობრივი არეულობის ორგანიზებაში, აკრიტიკებდა ოპოზიციას და ლუკაშენკას მიმართა პატივისცემას გამოხატავდა. პრატასევიჩის ოჯახმა განაცხადა, რომ აღიარება იძულებით არის ჩაწერილი, რადგან ჟურნალისტზე ძალადობა და ზეწოლა განხორციელდა.

25 ივნისს პრატასევიჩი და საპეგა შინაპატიმრობაში გადაიყვანეს.