სომხეთი გმობს თურქეთის პრეზიდენტ რეჯებ ტაიპ ერდოღანისა აზერბაიჯანის პრეზიდენტ ილჰამ ალიევის ერთობლივი ვიზიტი ქალაქ შუშაში. ამის შესახებ ნათქვამია სომხეთის საგარეო საქმეთა სამინისტროს მიერ გავრცელებულ განცხადებაში.
სომხეთის საგარეო უწყების შეფასებით, აზერბაიჯანისა და თურქეთის პრეზიდენტების შუშაში ვიზიტი ძირს უთხრის რეგიონულ მშვიდობასა და უსაფრთხოებას.
"მკაცრად ვგმობთ თურქეთისა და აზერბაიჯანის პრეზიდენტების ერთობლივ ვიზიტს სომხეთის ისტორიულ და კულტურულ ცენტრ - შუშაში, რომელიც ამჟამად აზერბაიჯანის ოკუპაციის ქვეშ იმყოფება და ვაფასებთ, როგორც პირდაპირი პროვოკაცია რეგიონული მშვიდობისა და უსაფრთხოების წინააღმდეგ.
ამ ვიზიტს წინ უძღოდა იძულებით გადაადგილებული მკვიდრი სომეხი მოსახლეობის რელიგიური, ისტორიული და კულტურული მემკვიდრეობის განადგურება, მათ შორის წმინდა მაცხოვრის "ღაზანჩეწოცის" საკათედრო ტაძრის შეურაცხყოფა ომის მიმდინარეობისას, თურქულ-აზერბაიჯანული ძალების მიერ და ასევე, "სომეხთა გენოციდის" მსხვერპლთა ხსოვნის მემორიალის სრული განადგურება.
თურქეთისა და აზერბაიჯანის ხელისუფლების ასეთი ქმედებები, რომლებიც მიზნად ისახავს მთიანი ყარაბაღის მოსახლეობის წინააღმდეგ ძალის გამოყენების შედეგების კონსოლიდაციას, მნიშვნელოვნად არღვევს რეგიონში სტაბილურობის დამყარების საერთაშორისო მცდელობებს და სრულიად მიუღებელია.
მთიანი ყარაბაღის სომეხთა უფლებების აღდგენა, რაც მოიცავს მთიანი ყარაბაღის რესპუბლიკის ტერიტორიების დეოკუპაციას და იძულებით გადაადგილებული მოსახლეობის უსაფრთხო დაბრუნებას, აუცილებელია სომეხი ხალხის წინააღმდეგ თურქულ-აზერბაიჯანული გენოციდური საფრთხის დასაძლევად.
ეს პროვოკაციული ქმედებები აშკარად ცხადყოფს ოფიციალური ანკარისა და ბაქოს მხრიდან გაკეთებული განცხადებების ცრუ და შეცდომაში შემყვან ხასიათს, სომხეთთან და სომეხ ხალხთან ურთიერთობების ნორმალიზების შესახებ.
ჩვენ კიდევ ერთხელ ხაზს ვუსვამთ, რომ ბოლოდროინდელი თურქეთ-აზერბაიჯანის აგრესიის შედეგების აღმოფხვრა უნდა განხორციელდეს მთიანი ყარაბაღის კონფლიქტის ყოვლისმომცველი მოგვარების ფარგლებში, ეუთოს მინსკის ჯგუფის თანათავმჯდომარეობის ეგიდით", - ნათქვამია განცხადებაში.
