ესტონეთში 2035 წლიდან რუსულენოვანი სკოლების დაფინანსება შეწყდება. განაცხადა ესტონეთის პრემიერ-მინისტრმა კაია კალასმა.
"ესტონური ენის განვითარების პროგრამა ითვალისწინებს, არაუგვიანეს 2035 წლისა, ესტონურენოვან სწავლებაზე გადასვლას, რის შემდეგაც რუსულენოვანი სკოლები არ დაფინანსდება სახელმწიფო ან ადგილობრივი მთავრობის ბიუჯეტიდან", - თქვა კალასმა.
რუსულენოვან სკოლებს შესაძლებლობა ექნებათ, განაგრძონ საგანმანათლებლო საქმიანობა, მხოლოდ სახელმწიფო დაფინანსების გარეშე.
კაია კალასმა აღნიშნა, რომ ესტონურ ენაზე სწავლა უზრუნველყოფს ბავშვებისა და ახალგაზრდების ინტეგრირებას ესტონურ კულტურასა და ღირებულების სისტემაში, ასევე ყველას აძლევს თანაბარ შესაძლებლობებს, მონაწილეობა მიიღონ სოციალურ და პოლიტიკურ ცხოვრებაში და გააგრძელონ განათლება შემდეგ საგანმანათლებლო დონეზე.
მისივე თქმით, "არავის აქვს განზრახვა, რაიმე გზით ჩაახშოს ან უგულვებელყოს რუსულენოვანი საზოგადოება".
