საქართველო # 1 ყველაზე აქტიური რეფორმატორი ქვეყანაა სამეწარმეო გარემოს გაუმჯობესების და მსოფლიოში ბიზნესის რეგულაციის რეფორმირების კუთხით. ასეთია მსოფლიო ბანკის მონაცემები, რომლებიც სპეციალურ ანგარიშში "ბიზნესის წარმოება 2011"-შია გამოქვეყნებული.
"დუინგ ბიზნესის" ახალ ანგარიშში ნათქვამია, რომ მსოფლიოს 174 ქვეყანას შორის საქართველომ ბოლო 5 წლის განმავლობაში ბიზნესგარემოს გაუმჯობესება ყველაზე უკეთ შეძლო.
ფინანსთა მინისტრის განცხადებით ეს შეფასება საკმაოდ მნიშვნელოვანია, იმიტომ, რომ მსოფლიოს 174 ქვეყნიდან საქართველო პირველია ბიზნესის სამეწარმეო გარემოს გაუმჯობესების კუთხით.
"საქართველო ნამდვილად გავიდა პირველ ადგილზე. თვითონ კორპორაციის პრესრელიზის მიხედვით დასახელდა წამატებულ ქვეყნად და ნათქვამია, რომ ყველაფერი ხუთი წლის განმავლობაში გატარებულმა რეფორმებმა განაპირობა ის, რომ საქართველომ ყველაზე უკეთ გააუმჯობესა ბიზნესგარემო მსოფლიოში. ყველაზე მნიშვნელოვანი გაუმჯობესება ჩვენ გვაქვს ინვესტორთა დაცვის კუთხით, ხოლო უკვე განხორციელებული რეფორმების კვალობაზე ჩვენ იმედი გვაქვს, რომ მომავალ წელს ჩვენ გვექნება უკვე შემდგომი დაწინაურება", _ აცხადებს საქართველოს ფინანსთა მინისტრი კახა ბაინდურაშვილი.