ქვეყანაში ე.წ. ინვალიდობის ტურიზმის განვითარებით ტურისტების 7-დან 10 პროცენტამდე ზრდას ელიან. როგორც არასამთავრობო ორგანიზაცია "პარსას" წარმომადგენელი ბესარიონ გიორგობიანი აცხადებს, მსოფლიოს განვითარებად ქვეყნებში ტურისტების მთლიან რაოდენობაში 10 პროცენტი სწორედ შეზღუდული შესაძლებლობების მქონდე პირთა ტურიზმზე მოდის.
"გაეროს კვლევებით, ინვალიდობის ტურიზმის მთლიან განვითარებაში მნიშვნელოვანი სეგმენტია. მაგალითად, აშშ-ში ინვალიდობის ტურიზმს მთლიანი ტურიზმის 24 პროცენტი უკავია. ხოლო განვითარებად ქვეყნებში ეს მაჩვენებელი 10, ზოგჯერ 15 პროცენტსაც აღწევს", _ განაცხადა გიორგობიანმა.
მისი განმარტებით, საქართველოში ასეთი ტურიზმის განვითარება შესაძლებელია და მნიშვნელოვანია, რადგან ასეთი სეგმენტის განვითარება ქვეყანაში დასაქმებულთა რაოდენობას გაზრდის. მისი თქმით, არასამთავრობო ორგანიზაცია კერძო სექტორთან ერთად მუშაობს პროექტზე, რომლის მიხედვითაც შესაძლებელი გახდება, რომ შეძღუდული შესაძლებლობის მქონდე პირები დასაქმდნენ ტურაგენეტებად, რომლებიც უშუალოდ ამ სეგმენტზე იქნებიან ორიენტირებულნი.
არასამთავრობო სექტორი მიიჩნევს, რომ სახელმწიფოსთან მჭიდრო თანამშრომლობით პროექტი განხორციელებადია, რაც დიდი დანახსარჯსაც არ მოითხოვს.
ტურიზმის ეროვნული სააგენტოს თავმჯდომარის მოადგილე ბექა ჯაყელი აცხადებს, რომ მსოფლიოს ყველა ქვეყანაში ამ მიმართულებით მუშააობა მიმდინარეობს.
"ჯანდაცვის მსოფლიო ორგანიზაციის კვლევებით, მსოფლიო მოსახლეობის 10 პროცენტს შეზღუდული შესაძლებლობების მქონდე პირებს წარმოადგენენ და სწორედ ამიტომ, ასეთი ტურიზმის განვითარება მნიშვნელოვანია",_ განაცხადა ჯაყელმა.
შეგახსენებთ, რომ ტურიზმის ეროვნული სააგენტოს ხელშეწყობით, ტურიზმის საინფორმაციო ცენტრში გაიმართა სამუშაო შეხვედრა კერძო, სახელმწიფო სექტორებსა და არასამთავრობო ორგანიზაციებს შორის, რომელიც შეზღუდული შესაძლებლობის მქონე პირთა ტურიზმის განვითარების პერსპექტივებს (ინვალიდობის ტურიზმი) მიეძღვნა.
ამ დროისთვის საქართველოშიც შეზღუდული შესაძლებლობის მქონე პირთა ტურისტული მომსახურებისთვის პროფესიონალი კადრები და ინფრასტრუქტურა არ არსებობს.