2011 წლის მთავარი საფინანსო დოკუმენტის პროექტის გადამუშავებულ ვარიანტს მთავრობა საკანონმდებლო ორგანოს დღეს გადაუგზავნის. ბიუჯეტი დაახლოებით 7 მილიარდი ლარი იქნება. პრიორიტეტი 2011 წელს კვლავ სოციალური და ჯანდაცვის სფეროებია. თანხის დიდი ნაწილი ასევე სოფლის მეურნეობასა და ინფრასტრუქტურული პროექტების განხორციელებას მოხმარდება.
საკანონმდებლო ორგანოში გადაგზავნის შემდეგ ბიუჯეტის პროექტს უკვე მეორედ განიხილავენ კომიტეტებში. ამის შემდეგ კი მომავალ კვირას სესიაზე დებატები გაიმართება.
საპარლამენტო ოპოზიციას უკვე აქვს შენიშვნები ახალ პროექტთან დაკავშირებით, ოპოზიცია ითხოვს, რომ ინფორმაცია თანხის გადანაწილების შესახებ უფრო გამჭვირვალე იყოს.