31 მაისი - მსოფლიო დღე თამბაქოს გარეშე (World No Tobacco Day) 1987 წლიდან აღინიშნება ჯანმრთელობის მსოფლიო ორგანიზაციის, პარტნიორი ორგანიზაციებისა და წევრი-ქვეყნების მიერ. ამ დღეს ყოველწლიურად ხდება ყურადღების გამახვილება ხდება თამბაქოს გლობალურ ეპიდემიაზე, თამბაქოსთან ასოცირებულ ჯანმრთელობისა და სხვა რისკებზე. ასევე, ხდება თამბაქოს მოხმარების შემცირებისკენ მიმართული ეფექტური პოლიტიკის ადვოკატირება.
2021 წელს დღის მსოფლიო თამბაქოს გარეშე აღსანიშნავად ჯანმრთელობის მსოფლიო ორგანიზაციამ წამოიწყო გლობალური კამპანია ლოზუნგით “Commit to Quit”. ინიციატივის მიზანია ხელი შეუწყოს 100 მილიონამდე ადამიანს მსოფლიოს მასშტაბით უარი თქვას თამბაქოს მოხმარებაზე სხვადასხვა მეთოდებისა თუ ციფრული საშუალებების დახმარებით. პროექტი ხელს შეუწყობს თამბაქოს შეწყვეტისთვის კიდევ უფრო ჯანმრთელი და ხელსაყრელი გარემოს შექმნას შემდეგი მეთოდებით: თამბაქოს მოხმარების შეწყვეტის ძლიერი პოლიტიკის ადვოკატირება
• მოწევის შეწყვეტის სერვისებზე ხელმისაწვდომობის გაზრდა
• თამბაქოს ინდუსტრიის ტაქტიკის შესახებ ცნობიერების ამაღლება
• მწეველების შესაძლებლობების გაზრდა თავის დანებების წარმატებული მცდელობისთვის.
COVID-19-ის პანდემიის პირობებში მილიონობით თამბაქოს მომხმარებელს გაუჩნდა თავის დანებების სურვილი.
თუმცა, თამბაქოზე თავის დანებება შესაძლოა გამოწვევა აღმოჩნდეს ეკონომიური თუ სოციალური სტრესის ფონზე, რომელიც COVID-19-ს ახლავს თან.
მსოფლიოში დაახლოებით 780 მილიონ ადამიანს სურს თამბაქოზე უარის თქმა, თუმცა მათგან მხოლოდ 30%-ს აქვს ხელმისაწვდომობა იმ საშუალებებზე, რომელიც მათ დაეხმარება ფიზიკური თუ ფსიქოლოგიური დამოკიდებულების დაძლევაში.
ჯანმრთელობის მსოფლიო ორგანიზაცია პარტნიორებთან ერთად ხელმისაწვდომს გახდის იმ საშუალებებსა და რესურსებს, რომელიც საჭიროა მოწევისთვის თავის დანებების უზრუნველსაყოფად.
საქართველო მრავალი წელია უერთდება ჯანმრთელობის მსოფლიო ორგანიზაციას და მის პარტნიორებს და ყოველწლიურად, სხვადასხვა ღონისძიებით აღნიშნავს დღეს მსოფლიო თამბაქოს გარეშე.
31 მაისს აჭარაში მსოფლიო დღე სხვადასხვა ღონისძიებით აღინიშნება. აჭარის საზოგადოებრივი ჯანდაცვის ცენტრის მიერ ხულოს მუნიციპალიტეტში პროგრამის - „თამბაქოს კვამლისაგან თავისუფალი კოალიციები საქართველოსა და სომხეთში: რანდომიზირებული კვლევა“ - ფარგლებში დაგეგმილია შემდეგი ღონისძიებები:
- საინფორმაციო - საგანმანათლებლო შეხვედრა დაბა ხულოს საჯარო სკოლის 7-8 კლასის მოსწავლეებთან, თემაზე - თამბაქოს მავნებლობა.
- ქუჩის ხელოვანების პერფორმანსი - მოწვეული მხატვარი ბავშვების ჩართულობით დაბა ხულოს სკვერში შექმნის ნამუშევარს, თამბაქოს მეორადი კვამლის მავნებლობის შესახებ.
- ღონისძიებაში მონაწილე ბავშვებს გადაეცემათ თამბაქოს მავნებლობის თემაზე შექმნილი საინფორმაციო მასალა და სუვენირები.
- სიმბოლური ჯილდო გადაეცემა დაბა ხულოს იმ ოჯახებს, სადაც არცერთი წევრი არ ეწევა.
ღობისძიება ხულოს მუნიციპალიტეტის მერიისა და ხულოს რესურსცენტრის მხარდაჭერით ჩატარდება.
