ბრაზილიის მასშტაბით მრავალრიცხოვანი საპროტესტო აქციები გაიმართა პრეზიდენტ ჟაირ ბოლსონაროს გადადგომის მოთხოვნით.
დემონსტრანტები პრეზიდენტს კორონავირუსის პანდემიის არაფექტურად მართვაში ადანაშაულებენ.
დედაქალაქ ბრაზილიაში ათასობით ადამიანი შეიკრიბა კონგრესის შენობის წინ პრეზიდენტის გადადგომისა და ვაქცინების შემოტანი მოთხოვნით.
დემონსტრაციები გაიმართა სხვა დიდ ქალაქებში, რიო-დე-ჟანეიროს ჩათვლით.
ბრაზილიაში ბოლსონაროს პოპულარობა მკვეთად დაეცა პანდემიაზე მისი რეაგირების არაეფექტურობის გამო.
ბრაზილიაში ვირუსულ ინფექციას 460 ათასზე მეტი ადამიანი ემსხვერპლა, რაც მსოფლიოში ყველაზე მაღალი მაჩვენებელია აშშ-ის შემდეგ. ბრაზილია კორონავირუსის 16 მილიონზე მეტი შემთხვევით მსოფლიოში მესამე ადგილზეა.
დემონსტრაციების ფონია ბრაზილიის სენატის მიერ დაწყებული ძიება, რომელიც ბოლსონაროს მთავრობის რეაგირებას პანდემიაზე და ვაქცინაციის პროგრამის ხარვეზებს სწავლობს.
ოპოზიციური პარტიები, პროფკავშირები და სამოქალაქო მოძრაობები ბოლსონაროს ვაქცინაციის პროგრამის შეფერხებასა და კოვიდ-19-ით გამოწვეული მძიმე შედეგების უგულვებელყოფაში ადანაშაულებენ.
მათი თქმით, კორონავირუსით ინფიცირების შემთხვევების რაოდენობამ ქვეყნის ჯანდაცვის სისტემა კოლაფსამდე მიიყვანა.
მემარჯვენე ბოლსონარო მუდმივად ეწინააღმდეგებოდა მკაცრი შეზღუდვების დაწესებას და ამტკიცებდა, ეკონომიკისთვის მიყენებული ზიანი ბევრად სავალალო იქნებოდა, ვიდრე თავად ვირუსის შედეგები. ის ასევე მუდმივად მოუწოდებდა მოქალაქეებს, რომ "შეწყვიტონ წუწუნი" ეპიდემიოლოგიური სიტუაციის გამო.
საპროტესტო აქციებზე ასევე გაისმოდა მოწოდებები ამაზონის ტყის ჩეხვის შეჩერების შესახებ.
