ფინანსთა სამინისტროს შემოსავლების სამსახურის ვებ-გვერდზე პირველი იანვრიდან ახალი საგადასახადო კოდექსის ყველა მუხლის ვიდეო განმარტება დაიდება.
ამის შესახებ საფინანსო საბიუჯეტო კომიტეტის სხდომაზე შემოსავლების სამსახურის უფროსმა გიორგი ცხაკაიამ განაცხადა.
მისი თქმით, ამ დროისთვის მიმდინარეობს ვიდეორგოლების ჩაწერა, რომელიც შემდეგ ექსპერტიზას გაივლის, რაიმე შეცდომა რომ არ გაიპაროს.
მომავლი წლის პირველი იანვრიდან კი უკვე მოხერხდება ვიდეორგოლების ვებ-გვერდზე განთავსება.
ამასთან კომიტეტის წევრებს გიორგი ცხაკაიამ შემოსავლების სამსახურის ექლეტრონული მომსახურებასთან დაკავშირებით ინფორმაცია მიაწოდა და ვებ-გვერდის პრეზენტაცია გამართა.
პარლამენტის საფინანსო-საბიუჯეტო კომიტეტის თავმჯდომარემ ზურაბ მელიქიშვილმა კი შემოსავლების სამსახურის უფროსს ინიციატივით მიმართა, პარლამენტს მის სამსახურში განხორციელებული რეფორმების შესახებ ინფორმაცია ყოველკვირეულად მიაწოდოს და პრეზენტაციები გამართოს.
"მნიშვნელოვანი რეფორმები მიმდინარეობს შემოსავლების სამსახურში, რომელიც უკავშირდება გადამხდელებისთვის მომსახურების და პროცედურების კიდევ უფრო გამარტივებას და ელექტრონულ სისტემაზე გადასვლა ამის ნათელი მაგალითია", - აღნიშნა ზურაბ მელიქიშვილმა.