სამოქალაქო ავიაციის საერთაშორისო ორგანიზაცია (ICAO) იწყებს მინსკის აეროპორტში Ryanair-ის თვითმფრინავის იძულებითი დაშვებისა და ოპოზიციურად განწყობილი ჟურნალისტის დაკავების გარემოებების გამოძიებას.
გამოძიების დაწყების გადაწყვეტიელება ICAO-ს საბჭომ 27 მაისს გამართულ საგანგებო სხდომაზე მიიღო.
ორგანიზაციის მიერ გავრცელებულ განცხადებაში ნათქვამია, რომ გამოძიების მიზანია, გამოარკვიოს დაარღვია, თუ არა ICAO-ს რომელიმე წევრმა ქვეყანამ საერთაშორისო სამართალი.
ICAO-მ მოუწოდა წევრ სახელმწიფოებს გამოძიებასთან თანამშრომლობისკენ.
ბელარუსის პრეზიდენტის ალიაქსანდრ ლუკაშენკას გადაწყვეტილებამ, ავიაგამანადგურებლის მეშვეობით იძულებით დაესვა Ryanair-ის თვითმფრინავი მინსკის აეროპოპორტში, საერთაშორისო შეშფოთება გამოიწვია.
თვითმფრინავში, რომელიც ათენი-ვილნიუსის რეისს ასრულებდა, იმყოფებოდნენ 26 წლის ოპოზიციურად განწყობილი ჟურნალისტი, პოლიტიკური აქტივისტი რომან პროტასევიჩი და მისი 23 წლის მეგობარი სოფია საპეგა.
ბელარუსის სამართალდამცავებმა თვითმფრინავის მინსკში დაშვების შემდეგ, პროტასევიჩი და საპეგა დააკავეს.
დასავლეთის ქვეყნებმა ლუკაშეკნკას ქმედება დაგმეს და დაკავებულების დაუყოვნებლივ გათავისუფლება მოსთხოვეს. ევროკავშირმა განაცხადა, რომ მუშაობს ბელარუსის წინააღმდეგ სანქციების გაფართოებაზე.
კვირის დასაწყისში, ევროკავშირის წევრი სახელმწიფოების ლიდერებმა მოუწოდეს ავიაკომპანიებს, რომ აღარ გამოიყენონ ბელარუსის საჰაერო სივრცე საერთაშორისო რეისებისთვის. მალევე, უმსხვილესმა ავიაკომპანიებმა განაცხადეს, რომ შეაჩერებენ ფრენებს ბელარუსის საჰაერო სივრცეში.
