სამშენებლო კომპანია "აქსისს" დაზარალებული მობინადრეები თაღლითობაში სდებენ ბრალს.
სამშენებლო კომპანია „აქსისის“ ოფისთან ის მოქალაქეები შეიკრიბნენ, ვინც წლების წინ „აქსისისგან“ ბინები იყიდა, თუმცა ჯერ არ ჩაბარებიათ. აქციის მონაწილეები ბინების ჩაბარებას ითხოვენ, წინააღდეგ შემთხვევაში პერმანენტულ აქციებს აანონსებენ.
მოქალაქეები იმ ბინების ჩაბარებას ითხოვენ, რაშიც ფული 2006 წელს გადაიხადეს.
"2006 წელს შევიტანეთ თანხები. ბინები უნდა ჩაგვბარებოდა 2008 წელს. იმის შემდეგ გავიდა 16 წელი და ბინები არ გვბარდება. ჩვენ აქსისის ერთი სიტყვის არ გვჯერა, ამდენი წელია თაღლითურად გვატყუებს“, - ამბობენ დაზარალებულები.
აქსისის წარმომადგენელმა თქვა, რომ კომპანია რამდენიმე დღეში განაალხებს მშენებლობას და ამასთან დაკავშირებით, მერია გაავრცელებს ოფიციალურ განცხადებას.
დაზარალებულებმა არაერთხელ მიმართეს საქალაქო სასამართლოს და უამრავი დავაც მოიგეს, თუმცა აღსრულება ვერ ხერხდება. ხელშეკრულება მომხმარებლების ნაწილმა "აქსისთან", ნაწილმა კი "აქსის დეველოპმენტთან" 2006-08 წლებში გააფორმა. მშენებლობა 208-12 წლებში უნდა დასრულებულიყო.
საუბარია, “აქსის პალასი 1”-ის “აქსის პალასი 2”-ისა და „აქსისპალასი საირმის“ პროექტებზე, რომელიც მშენელობა კომპანიამ 16 წლის დაიწყო და დღემდე არ დაუსრულებია. დაუზუსტებელი ინფორმაციით, “აქსისის” მიერ დაზარალებულთა რიცხვი 300 ოჯახს აჭარბებს.
