დამოუკიდებელმა გამოძიებამ დაასკვნა, რომ BBC-ის ჟურნალისტმა მარტინ ბაშირმა პრინცესა დიანასთან ინტერვიუ, მიიღო ყალბი დოკუმენტების მეშვეობით. ჟურნალისტმა ამის შესახებ ხელმძღვანელობასაც მოატუყა. პრინცესა ინტერვიუში პრინც ჩარლზის ღალატსა და კამილა პარკერ ბოულსთან მის ურთიერთობაზე საუბრობდა.
დასკვნის მიხედვით, რომელიც დამოუკიდებელმა კომისიამ გამოაქვეყნა, ჟურნალისტმა მარტინ ბაშირმა არაეთიკური მეთოდები გამოიყენა, იმისათვის, რომ პრინცესას ინტერვიუში პირად თემებზე ესაუბრა.
კერძოდ, გაირკვა, რომ მარტინ ბაშირმა დიანას ძმას გრაფ სპენსერს აჩვენა საბანკო ამონაწერი, რათა მისი ნდობა მოეპოვებინა, მისი მეშვეობით კი პრინცესას დაკავშირებოდა. საბანკო ამონაწერის მიხედვით, თითქოს გარკვეულ პირებს პრინცესაზე თვალთვალისთვის ფულს უხდიდნენ. ამგვარად, ჟურნალისტს სურდა დიანასთვის შეექმნა შთაბეჭდილება, რომ პრინცესას გარემოცვის წევრები ტაბლოიდებს თანხის სანაცვლოდ მისი პირადი ცხოვრების შესახებ ცნობებს აწვდიდნენ, ამიტომ უმჯობესი იქნებოდა, პრინცესას პირად ცხოვრებაზე თვითონ ესაუბრა.
ბაშირმა დოკუმენტების გაყალბებისთვის ბოდიში მოიხადა, თუმცა განაცხადა, რომ საბანკო ამონაწერებს პრინცესა დაიანას გადაწყვეტილებასთან - პირად ცხოვრებაზე ესაუბრა, კავშირი არ ჰქონია.
აღნიშნულის გამო ბოდიში მოიხადა BBC-ის აღმასრულებელმა დირექტორმა თიმ დეივიმაც.
ეს ინტერვიუ იყო პირველი შემთხვევა, როდესაც ბრიტანეთის სამეფო ოჯახის წევრმა, ღიად ისაუბრა პირად ცხოვრებასა და სამეფო ოჯახზე.
გამოძიების შედეგების გამოქვეყნების შემდეგ, პრინცესა დიანას ვაჟებმა, პრინცმა უილიამმა და ჰარიმ მწვავედ გაკიცხეს BBC-ის ხელმძღვანელობა. მათი განცხადებით, ინტერვიუს ჩაწერის შესაძლებლობის მიუღებელმა ხერხებმა გავლენა მოახდინეს იმაზე, თუ რაზეც ისაუბრა პრინცესა დიანამ, რამაც თავის მხრივ, ხელი შეუწყო მათი მშობლების კავშირის საბოლოოდ გაწყვეტას.
