ისრაელის თავდაცვის ძალებმა სახმელეთო დანაყოფების დახმარებით, გასული ღამის განმავლობაში პალესტინის ტერიტორიაზე რადიკალური დაჯგუფებების სამხედრო ობიექტების წინააღმდეგ მასშტაბური იერიში მიიტანა.
ისრაელის არმიის ოფიციალურმა წარმომადგენელმა ჯონათან კონრიკუსმა ჟურნალისტებს განუცხადა, რომ 160 თვითმფრინავი 40 წუთის განმავლობაში 150 ობიექტს ერთდროულად უტევდა.
მისი თქმით, კონფლიქტის დაწყებიდან ეს იყო უმსხვილესი ოპერაცია, რომელშიც მონაწილეობდნენ სახმელეთო დანაყოფები. მისივე თქმით, არცერთი ისრაელელი ჯარისკაცი ღაზას სექტორში არ შესულა. როგორც კონრიკუსმა აღნიშნა, იერიშების სამიზნეს წარმოადგენდა ასობით გვირაბი, რომლებსაც ტერორისტები ტრანსპორტირებისა და თავშესაფრებისთვის იყენებენ.
მისი თქმით, მედიაში გავრცელდა ინფორმაცია ღაზაში სახმელეთო ოპერაციის დაწყების შესახებ, რაც სინამდვილეს არ შეესაბამება. მისივე თქმით, ისრაელის არმიის პრესსამსახურის ინგლისურენოვან ინფორმაციაში, უზუსტობა გაიპარა. შეკითხვაზე აპირებს თუ არა ისრაელი სახმელეთო ოპერაციის დაწყებას ღაზას სექტორში, კონრიკუსმა უპასუხა, რომ არმიას აქვს გეგმები, მაგრამ ამაზე ინფორმაციას ჟურნალიტებს ვერ მიაწვდის.
როგორც კონრიკუსმა აღნიშნა, ჰამასმა ისრაელის ტერიტორიაზე 10 მაისის შემდეგ 1 800-ზე მეტი რაკეტა ისროლა, მათგან 430 ღაზის ტერიტორიაზე ჩავარდა. რაკეტების 90 პროცენტი რკინის გუმბათმა გაანეიტრალა. ისრაელის მხარეს, გარდაცვლილია 9 ადამიანი, მათ შორის ორი ბავშვი და ერთი სამხედრო.
ღაზაში ისრაელის საპასუხო ავიაიერიშებს, ბოლო მონაცემებით, 118 ადამიანი ემსხვერპლა, მათ შორის 28 ბავშვია. ისრაელის განცხადებით, თავდაცვის ძალების სამიზნეს ტერორისტების ობიექტები წარმოადგენს.
