შეერთებული შტატების დაავადებათა კონტროლისა და პრევენციის ცენტრის (CDC) გადაწყვეტილებით, აშშ-ში სრულად ვაქცინირებული მოქალაქეებისთვის ნებადართული იქნება ნიღბის გარეშე გადაადგილება.
პრეზიდენტმა ჯო ბაიდენმა მიულოცა ამერიკელებს ეს "შესანიშნავი დღე". ამ დღის აღსანიშნავად, ბაიდენმა ოვალურ ოფისში რესპუბლიკელ კანონმდებლებთან შეხვედრისას დემონსტრაციულად მოიხსნა ნიღაბი.
სიახლის გაჟღერების შემდეგ, პრეზიდენტმა ბაიდენმა, ვიცე-პრეზიდენტმა ჰარისმა და თეთრი სახლის თანამშრომლებმა ვარდების ბაღში ნიღბების გარეშე გაიარეს.
დაავადებთა კონტროლის ცენტრის ინფორმაციით, ნიღბის ტარება კვლავ რეკომენდებულია საზოგადოებრივ ტრანსპორტში, თვითმფრინავებსა და საავადმყოფოებში.
დაავადებათა კონტროლისა და პრევენციის ცენტრის (CDC) ახალი ინსტრუქციის თანახმად, სრულად ვაქცინირებულებისთვის შესაძლოა ფიზიკური დისტანცირების დაცვაც აღარ იყოს სავალდებულო.
ამ დროისთვის აშშ-ში ადმინისტრირებულია 265 მილიონი დოზა ვაქცინა, აქედან ორი დოზით (ანუ სრულად) ვაქცინირებულია 118 მილიონი ადამიანი, რაც ჯამურად აშშ-ს მოსახლეობის 36%-მდეა.
