საქართველოში ბოლივუდური ფილმის გადაღებისთვის საჭირო გარემოს შესასწავლად იანვარში ინდური საპროდიუსერო კომპანიის წარმომადგენლები ჩამოვლენ. ამის შესახებ ჟურნალისტებს საქართველოს ეკონომიკის მინისტრმა ვერა ქობალიამ განუცხადა.
მისი განმარტებით, საქართველოში ჩამოსვლას იმ მსხვილი ინდური საპროდიუსერო კომპანიის წარმომადგენლები აპირებენ, რომელთა მიერაც გადაღებულმა ბოლო ფილმმა წლევანდელ ოსკარის დაჯილდოვების ცერემონიალზე მთავარი ჯილდო მოიპოვა.
"ბოლივუდში ბოლო დროს ძალიან პოპულარული გახდა ფილმების სხვადასხვა ქვეყნებში გადაღება. ამით ჩვენც დავინტერესდით და დავუკავშირდით ყველაზე დიდ საპროდიუსერო კომპანიებს, რომლებიც ბოლივუდური ფილმების გადაღებაზე მუშაობენ", - განაცხადა ქობალიამ.
მინისტრისვე განმარტებით, ბოლივუდური ფილმის საქართველოში გადაღება ტურიზმის განვითარებას და ახალი სამუშაო ადგილების შექმნას შეუწყობს ხელს, რადგან ასეთ შემთხვევაში ქვეყანაში ფილმზე მომუშავე რამდენიმე ათას პირს მოუწევს ჩამოსვლა.