რუსეთი სლოვაკეთის, ლატვიის, ლიეტუვისა და ესტონეთის დიპლომატიური მისიების თანამშრომლებს აძევებს. შესაბამისი გადაწყვეტილება რუსეთის საგარეო საქმეთა სამინისტრომ გამოაქვეყნა.
საგარეო საქმეთა სამინისტროს ინფორმაციით, ნაცვალგების პრინიციპის გათვალისწინებით, რუსეთიდან გააძევეს ლიეტუვის საელჩოს ორი, სლოვაკეთის საელჩოს სამი და ლატვიისა და ესტონეთის საელჩოების თითო-თითო თანამშრომელი.
"ვილნიუსი, რიგა და ტალინი აგრძელებენ ღია, მტრულ კურსს რუსეთის წინააღმდეგ, რომელსაც ჩეხეთის ქმედებების მიმართ ფსევდო სოლიდარობით ნიღბავენ. საელჩოების თანამშრომლებმა შვიდი დღის ვადაში უნდა დატოვონ რუსეთის ფედერაციის ტერიტორია", - ნათქვამია განცხადებაში.
მანამდე სლოვაკეთმა, ლიეტუვამ, ლატვიამ და ესტონეთმა, ჩეხეთისადმი სოლიდარობის ნიშნად, რუსი დიპლომატები გააძევა.
ჩეხეთმა რუსული სპეცსამსახურები დაადანაშაულა 2014 წელს სოფელ ვრბეტიცეში საბრძოლო მასალების საწყობის აფეთქებაში, რასაც ორი მოქალაქე ემსხვერპლა. პრაღამ გააძევა 18 რუსი დიპლომატი, რასაც რუსეთმა ჩეხეთის საელჩოს 20 თანამშრომლის გაძევებით უპასუხა. ამის შემდეგ, ჩეხეთმა, კიდევ რუსეთის საელჩოს კიდევ 63 თანამშრომელი გააძევა.
