მსოფლიო ბანკმა საქართველოს დამატებით 45 მლნ. დოლარი გამოუყო.
როგორც ბანკის ოფიციალურ განცხადებაშია აღნიშნული, მსოფლიო ბანკის აღმასრულებელ დირექტორთა საბჭომ საქართველოსთვის დაამტკიცა 45 მილიონი აშშ დოლარის დამატებითი დაფინანსება, რეგიონალური და მუნიციპალური ინფრასტრუქტურის განვითარების პროექტის გასახორციელებლად.
ბანკის ინფორმაციით, საქართველოს მთავრობამ მიმდინარე პროექტის მასშტაბების გასაზრდელად, დამატებითი დაფინანსება მოითხოვა რაც მუნიციპალური სამსახურებისა და ინფრასტრუქტურის რეაბილიტაციისათვის, ასევე მთელი რიგი შერჩეული ქალაქებისთვის სტრატეგიული განვითარების გეგმების შესამუშავებლად უნდა დაიხარჯოს.
თავდაპირველი, რეგიონალური და მუნიციპალური ინფრასტრუქტურის განვითარების პროექტი (40 მლნ აშშ დოლარის ექვივალენტი საერთაშორისო განვითარების ასოციაციის კრედიტი) მომზადებული იყო 2008 წლის აგვისტოს კონფლიქტის შედეგად მოყენებული ზიანის შესამცირებლად. პროექტი მსოფლიო ბანკის აღმასრულებელ დირექტორთა საბჭოს მიერ დამტკიცებული იყო 2008 წლის 2 ოქტომბერს. დამატებითი დაფინანსება მოიცავს რეკონსტრუქციისა და განვითარების საერთაშორისო ბანკის 33.5 მილიონ აშშ დოლარიან სესხს და საერთაშორისო განვითარების ასოციაციის კრედიტს 11.5 მილიონი აშშ დოლარის ოდენობით.
"ეს პროექტი ათობით ათას ქართულ Oოჯახს მთელი Qქვეყნის მასშთაბით დიდ სარგებელს მოუტანს - ადგილობვრივი გზების აღდგენით, სასმელი წყლის უზრუნველყოფით და სანიტარული პირობების გაუმჯობესებით. ევროკავშირის თანადაფინანსებით გაგრძელდება ინფრასტრუქტურის აღდგენა და კონფლიქტის შედეგად დაზარალებული მოსახლეობის საცხოვრებელი პირობების გაუმჯობესება. პროექტი, აგრეთვე, გაზრდის მუნიციპალიტეტების საქმიანობის Eეფექტურობას,"- განცხადა მსოფლიო ბანკის რეგიონულმა დირექტორმა სამხრეთ კავკასიაში ასად ალამმა.
მსოფლიო ბანკშის საქართველოს წარმომადგენლობაში აცხადებენ, რომ პროექტი ხელს შეუწყობს ინფრასტრუქტურის განვითარებაში ინვესტირებას როგორც მუნიციპალური განვითარების ფონდის მიერ კრედიტუნარიანი მუნიციპალიტეტებისთვის სესხების გაცემის საშუალებით, ასევე გრანტის გაცემით ისეთი მუნიციპალიტეტებისთვის, რომლებიც ჯერ მზად არ არიან სესხის ასაღებად. მდგრადი და ეფექტური შედეგების მიღწევის მიზნით, მონაწილე მუნიციპალიტეტებს გაეწევათ ტექნიკური დახმარება.
"მუნიციპალური განვითარების ფონდი ჩამოყალიბდა არასაბანკო ფინანსურ შუამავალ ორგანიზაციად, რომელიც ასრულებს ძალიან მნიშვნელოვან როლს მუნიციპალური ინფრასტრუქტურის განვითარების დაფინანსების საქმეში. მისი მუშაობა სათანადოდ ფასდება და აისახება როგორც მთავრობის, ასევე დონორების მზარდ ინტერესში მიმართონ ფონდს, როგორც პირველად ორგანიზაციას ადგილობრივი თვითმმართველობებისთვის გრანტებისა და კრედიტების გასაცემად,"- განაცხადა მსოფლიო ბანკის მდგრადი განვითარების სექტორის კოორდინატორმა სამხრეთ კავკასიაში აჰმედ ეივეიდამ.
აღნიშნული პროექტი გულისხმობს მნიშვნელოვან თანამშრომლობას დონორებთან. მსოფლიო ბანკს დადებული აქვს ხელშეკრულება ათასწლეულის გამოწვევის კორპორაციასთან, რათა მან ზედამხედველობა გაუწიოს იმ მუნიციპალური განვითარების პროექტებს, რომლებსაც მუნიციპალური განვითარების ფონდი ახორციელებს. Aამავდროულად, მოქმედებს ევროკავშირთან ახლახანს დადებული თანადაფინანსების სატრასტო ფონდის ხელშეკრულება დევნილებთან დაკავშირებული საქმიანობის დაფინანსების თაობაზე. მსოფლიო ბანკი ასევე თანამშრომლობს აზიის განვითარების ბანკთან, ევროპის რეკონსტრუქციისა და განვითარების ბანკთან, ამერიკის შეერთებული შტატების საერთაშორისო განვითარების სააგენტოსთან, გერმანიის ტექნიკური თანამშრომლობის სააგენტოსთან და გერმანიის რეკონსტრუქციის ბანკთან, ასევე გაეროს ლტოლვილთა უმაღლეს კომისარიატთან და ქალაქების ალიანსის პროგრამასთან - ყველა მათგანი უზრუნველყოფს ტექნიკურ დახმარებას ან აფინანსებს მუნიციპალური ინფრასტრუქტურის განვითარების პროექტებს.
დღეისათვის საქართველოში მსოფლიო ბანკის საკრედიტო პორტფელი შედგება 469 მილიონი აშშ. დოლარის ღირებულების 12 მოქმედი საინვესტიციო პროექტისგან. დამატებით, 2010 წლის ივლისში მსოფლიო ბანკის დირექტორთა საბჭომ განვითარების პოლიტიკის ღონისძიების (DPO2) ფარგლებში 50 მილიონი აშშ დოლარის ღირებულების რიგით მეორე პროექტი დაამტკიცა.
საერთაშორისო განვითარების ასოციაციის კრედიტი 20-წლიანია და გადახდის დაწყების ვადა 10 წელია, ხოლო რეკონსტრუქციისა და განვითარების საერთაშორისო ბანკის სესხი 27-წლიანია და სესხის დაბრუნება 8 წელიწადში დაიწყება.
GONO MDGOMA