ამერიკული ფარმაცევტული კომპანია Pfizer-ის აღმასრულებელი დირექტორის ალბერტ ბურლას განცხადებით, კორონავირუსის სამკურნალო ანტივირუსული აბები საზოგადოებისთვის ხელმისაწვდომი 2021 წლის ბოლოსთვის იქნება. ამის შესახებ ბურლამ ამერიკული ტელეკომპანია CNBC-ის ეთერში განაცხადა.
ალბერტ ბურლას განცხადებით, ამ დროისთვის კომპანიას ხელთ აქვს სარწმუნო ცნობები, რომ ანტივირუსული აბები ეფექტური იქნება კორონავირუსის ყველა შტამის წინააღმდეგ.
გავრცელებული ინფორმაციით, კორონავირუსის საწინააღმდეგო აბების კლინიკური გამოცდა შეერთებულ შტატებსა და ბელგიაში მიმდინარეობს, რომელშიც ზრდასრული მოხალისეები მონაწილეობენ.
ალბერტ ბურლას თქმით, კომპანია გამოცდის ანტივირუსული მედიკამენტის ორ სახეობას, ერთ-ერთი მათგანი ინტრავენური გზით შეჰყავთ ადამიანის ორგანიზმში, ხოლო მეორე პერორალურად მიიღება (წამლის მიღება პირის ღრუს მეშვეობით).
მისივე თქმით, ფარმაცევტული კომპანია ძირითადად ფოკუსირებულია პერორალურ აბებზე, რადგან ის ლოჯისტიკური თვალსაზრისით ბევრ უპირატესობას მოიცავს და მისი ხელმისაწვდომობა გაცილებით იოლი იქნება.