ეპიდსიტუაცია უკიდურესად დამძიმდა ინდოეთში. ქვეყანაში რეკორდულად იზრდება კოვიდინფიცირებულთა რაოდენობა. გასულ დღე-ღამეში კორონავირუსით კიდევ 349 600 ადამიანი დაინფიცირდა. იუწყება Associated Press-ი.
საერთო ჯამში ინდოეთში კოვიდ-19-ით ინფიცირებულთა რაოდენობამ 16,9 მილიონს გადააჭარბა. ბოლო 24 საათში გარდაიცვალა 2 767 პაციენტი.
მედიის ინფორმაციით, ინდოეთის დიდ ქალაქებში კოვიდკლინკები გადავსებულია და პაციენტების მიღებას ვერ ახერხებენ. დელის უდიდესი კლინიკები აცხადებენ, რომ ჟანგბადის მარაგები ამოეწურათ.
გარდა ამისა, გადატვირთულია კოვიდტესტირების ცენტრები, ადამიანები საათობით დგანან რიგებში. 24 საათს განმავლობაში მუშაობენ კრემატორიუმები.
საერთაშორისო ძალისხმევის მობილიზება მიმდინარეობს ინდოეთის დასახმარებლად, რომელიც კორონავირუსის პანდემიის დამანგრეველი ტალღის ფონზე, ჟანგბადის კრიტიკულ უკმარისობას განიცდის.
დიდ ბრიტანეთმა უკვე დაიწყო ხელოვნური სუნთქვის აპარატებისა და ჟანგბადის კონცენტრატორების გაგზავნა ინდოეთში. პარალელურად, ევროკავშირის წევრები ამზადებენ დახმარების პაკეტებს.
ევროკომისიის პრეზიდენტმა ურსულა ფონ დერ ლაიენმა განაცხადა, რომ ევროკავშირი ახდენს რესურსების მობილიზებას, რათა ინდოეთს სწრაფი დახმარება აღმოუჩინონ. მისი თქმით, ბრიუსელი ინდოეთს ჟანგბადსა და მედიკამენტებს მიაწვდის.
შეერთებული შტატები ინდოეთს დახმარებას დაპირდა და ქვეყანაში ჟანგბადის ბალონების, კორონავირუსის ტესტების, მედიკამენტებისა და ინდივიდუალური დაცვის საშუალებების გაგზავნას გეგმავს. პრეზიდენტის მრჩეველმა უსაფრთხოების საკითხებში ჯეკ სალივანმა განაცხადა, რომ 24-საათიან რეჟიმში მუშაობენ, რათა ინდოეთს სამედიცინო დახმარება დროულად გაუწიონ.
თეთრმა სახლმა გამოაცხადა, რომ ვაშინგტონი მოხსნის საექსპორტო კონტროლს ვაქცინის ნედლეულზე და გაუგზავნის ინდოეთის ვაქცინის მწარმოებლებს.
საფრანგეთი იუწყება, რომ ინდოეთს ჟანგბადის მარაგებს გადასცემს.
მეზობელმა პაკისტანმა, რომელსაც დელისთან ტერიტორიული დავის ფონზე დაძაბული ურთიერთობა აქვს, ინდოეთს სამედიცინო აღჭურვილობის მიწოდება შესთავაზა.
