შეერთებული შტატების პრეზიდენტი ჯო ბაიდენი და რუსეთის პრეზიდენტი ვლადიმირ პუტინი შესაძლოა ივნისში შეხვდნენ. ამის შესახებ პუტინის მრჩეველმა, იური უშაკოვმა განაცხადა.
მისი თქმით, საბოლოო გადაწყვეტილება ჯერ არ არის მიღებული და პრეზიდენტების შეხვედრა დამოკიდებულია "მრავალ სხვადასხვა ფაქტორზე".
"რა თქმა უნდა, გადაწყვეტილებას მრავალი ფაქტორის გათვალისწინებით მივიღებთ", - თქვა უშაკოვმა, პუტინის საგარეო პოლიტიკის მრჩეველმა, რომელიც 1998-2008 წლებში რუსეთის ელჩად მუშაობდა შეერთებულ შტატებში.
გარდა ამისა, რუსეთის საგარეო საქმეთა მინისტრმა, სერგეი ლავროვმა დღეს განაცხადა, რომ ბაიდენის წინადადება ერთობლივი სამიტის ჩატარების შესახებ "დადებითად" იქნა მიღებული და ახლა მიმდინარეობს მისი შესწავლა.
მანამდე, მიმდინარე თვეს ბაიდენი გამოვიდა მოწოდებით, რუსეთის პრეზიდენტან ერთობლივი სამიტის გამართვის შესახებ, სადაც მრავალ სადავო საკითხებს განიხილავდნენ.
მაშინ კრემლმა თქვა, რომ სამიტი დამოკიდებული იქნება აშშ-ის ქმედებებზე და, ზოგიერთი ცნობით, ვაშინგტონს მოუწოდა უარი ეთქვა რუსეთისთვის ახალი სანქციების დაწესებაზე.
ცივი ომის დასრულების შემდეგ, რუსეთსა და ამერიკის შეერთებულ შტატებს შორის ურთიერთობების სიმწვავე ახალ ნიშნულს მიუახლოვდა, როდესაც ბაიდენმა ერთ-ერთ ინტერვიუში, დადებითად უპასუხა შეკითხვას, ფიქრობს თუ არა, რომ პუტინი მკვლელია. მალევე კრემლმა საკუთარი ელჩი კონსლუტაციებისთვის მოსკოვში გამოიძახა.
მოსკოვის პროტესტის მიუხედავად, ამ თვეში აშშ-მა ახალი სანქციები დააწესა რუსეთის წინააღმდეგ 2020 წლის არჩევნებში ჩარევის, კიბერშეტევის და სხვა მავნე მოქმედებების გამო.
სულ ახლახან პუტინმა მონაწილეობა მიიღო ბაიდენის მიერ ორგანიზებულ ვირტუალურ კლიმატის სამიტში.
