რუსეთის საგარეო საქმეთა სამინისტროს ოფიციალური წარმომადგენელი მარია ზახაროვა აცხადებს, რომ მიმდინარეობს რუსეთისადმი არამეგობრული ქვეყნების სიის ფორმირება.
ზახაროვას განცხადებით, ამ სიაში შემავალი სახელმწიფოები ვეღარ შეძლებენ რუსეთის მოქალაქეების დასაქმებას [რუსეთის ტერიტორიაზე განლაგებულ] დიპლომატიურ მისიებში.
მისივე თქმით, შეერთებული შტატები უკვე არის რუსეთისადმი არამეგობრული ქვეყნების სიაში.
სიაში შემავალი ქვეყნები მას შემდეგ გახდება ცნობილი, რაც მას მთავრობა შესაბამისი განკარგულებით დაამტკიცებს.
"ამ სიის შექმნა არა ჩვენი ქვეყნის არამეგობრული ქმედებებია, არამედ ის არის პასუხი, თუ როგორ უნდა დავიცვათ თავი მტრული, არამეგობრული ქმედებებისგან", - თქვა ზახაროვამ.
რუსეთის პრეზიდენტმა ვლადიმერ პუტინმა პარასკევს, 23 აპრილს ხელი მოაწერა განკარგულებას "უცხო სახელმწიფოების არაკეთილგანწყობილ ქმედებებზე გავლენის (კონტრრეაქციის) ზომების გამოყენების შესახებ".
დღეს, 25 აპრილს, რუსეთის საგარეო საქმეთა მინისტრმა სერგეი ლავროვმა გამოთქვა მზადყოფნა მიიღოს ახალი საპასუხო ზომები შეერთებული შტატების წინააღმდეგ, თუ ისინი გააგრძელებენ ესკალაციის გზას. მანამდე რუსეთმა აშშ-ის ს სანქციების საპასუხოდ ათი დიპლომატის გაძევებისა და აშშ-ის დიპლომატიური მისიების მუშაობის შეზღუდვის შესახებ განაცხადა.
