პოეტი ზურაბ რთველიაშვილი მახათას მწერალთა და საზოგადო მოღვაწეთა პანთეონში დაკრძალეს.
ქაშუეთის ტაძარში გამართულ სამოქალაქო პანაშვიდზე ზურაბ რთველიაშვილის ხსოვნას პატივი მიაგო კულტურის, სპორტისა და ახალგაზრდობის მინისტრმა, თეა წულუკიანმა.
ერთთვიანი ავადმყოფობის შემდეგ პოეტი ზურაბ რთველიაშვილი 20 აპრილს გარდაიცვალა.
ზურაბ რთველიაშვილი დაიბადა 1967 წელს, ქალაქ ყარაგანდაში, ყაზახეთში. 1990-იან წლებში გამოდიოდა პოეტური პერფორმანსებით დავით ჩიხლაძესთან, შოთა იათაშვილთან და სხვებთან ერთად. 2010 წელს შვედეთში პოლიტიკური თავშესაფარი მიიღო. 2020 წელს ის საქართველოში დაბრუნდა.
ზურაბ რთველიაშვილი საკუთარი ლექსებითა და პერფორმანსებით, თანამედროვეობის გამორჩეული ხელოვანი იყო. იგი იყო ავტორი ლექსებისა: „აპოკრიფი“, „ოდდა თავისუფლებას“, „წმინდა მგლების ლოცვა“, „მე ვარ ვენახი“ და სხვა. 2018 წელს, წიგნისთვის „პოეზიის დიქტატურა“ ლიტერატურული პრემია „საბა“ მიიღო.
