ინდოეთში, მუმბაის მახლობლად მდებარე კლინიკის რეანიმაციულ განყოფილებაში, სადაც კოვიდინფიცირებულ პაციენტებს მკურნალობდნენ, ხანძარი გაჩნდა.
ტრაგიკულ შემთხვევას, რომელიც პარასკევს გამთენიისას მოხდა, სულ მცირე 13 ადამიანი ემსხვერპლა. იუწყებიან, რომ ოთხი გადარჩენილი პაციენტი მიმდებარე საავადმყოფოებში გადააანაწილეს.
უცნობია ხანძრის გამომწვევი მიზეზები. პრემიერ-მინისტრი ნარენდრა მოდი სოციალურ ქსელში გამოეხმაურა ხანძარს, დაღუპულთა ოჯახებს მიუსამძიმრა და მომხდარს "ტრაგიკული" უწოდა.
ამ უბედური შემთხვევის ფონია კრიტიკული ეპიდემიოლოგიური ვითარება. ბოლო რამდენიმე დღეა ინდოეთში კორონავირუსით ინფიცირების რეკორდული რაოდენობა ვლინდება. ბოლო 24 საათში, ქვეყანაში ინფიცირების 332 000-ზე მეტი შემთხვევა გამოვლინდა, წინა 24 საათში 314 000-ზე მეტი.
რეკორდულმა შემთხვევებმა კიდევ უფრო გადატვირთა ისედაც კრიტიკულ მდგომარეობაში მყოფი კლინიკები. იუწყებიან, რომ დედაქალაქის რამდენიმე მსხვილ კლინიკაში ჟანგბადის მარაგები ამოიწურა. ასევე, არ აქვთ საკმარისი ხელოვნური სუნთქვის აპარატები.
გავრცელებული ინფორმაციით, პრემიერი-მინისტრი მოდი დღეს ეპიდემიით ყველაზე მეტად დაზარალებული შტატების ხელმძღვანელებსა და ჟანგბადის მწარმოებლებთან შეხვედრას გამართავს, რათა იმსჯელონ ვითარებიდან გამოსავლის გზებზე.
რამდენიმე დღის წინ, ინდოეთის უმაღლესმა სასამართლომ დაავალა ცენტრალურ ხელისუფლებას, დაუყოვნებლივ წარმოადგინოს ეროვნული გეგმა თუ როგორ აპირებს ჟანგბადის რესურსების სიმწირის პრობლემის გადაჭრას, გადატვირთული კლინიკური სექტორის საკითხის დაძლევასა და ვაქცინაციის კამპანიის დაჩქარებას.
