ჯონ ჰოპკინსის უნივერსიტეტის მონაცემებით, მსოფლიოში კოვიდ -19 პანდემიის შედეგად გარდაცვლილთა რიცხვმა სამ მილიონს გადააჭარბა.
პანდემიის დაწყებიდან ვირუსით ინფიცირების თითქმის 140 მილიონი შემთხვევა დაფიქსირდა.
ჯანმრთელობის მსოფლიო ორგანიზაციის გენერალური დირექტორის, ტედროს ადანომ ღებრეიესუსის განცხადებით, მსოფლიოში კორონავირუსის ახალი შემთხვევები და სიკვდილობის მაჩვენებელი "შემაშფოთებელი ტემპებით იზრდება". მხოლოდ ინდოეთში 18 აპრილის მონაცემებით, 230 000-ზე მეტი ახალი შემთხვევა აღირიცხა.
ინფიცირების შემთხვევის მატების კვალდაკვალ, მსოფლიოში ვაქცინაციის პროცესი საშუალოზე დაბალი ტემპით მიმდინარეობს. ბოლო მონაცემებით, 165 ქვეყანაში ვაქცინის 860 მილიონზე მეტი დოზა გაკეთდა.
მსოფლიოში მხოლოდ რამდენიმე ქვეყანაა, სადაც მოსახლეობის დიდ ნაწილს უკვე ჩაუტარდა ვაქცინაცია. მათ შორისაა ისრაელი და დიდი ბრიტანეთი. ამ ქვეყნებში ინფიცირების მაღალი მაჩვენებელი მკვეთრად შემცირდა.
ჯანმრთელობის მსოფლიო ორგანიზაციამ კორონავირუსის პანდემია 2020 წლის 11 მარტს გამოაცხადა.