ნათლად ვუთხარი რუსეთის პრეზიდენტ პუტინს, რომ სანქციებთან დაკავშირებით, უფრო შორს წასვლაც შეგვეძლო, მაგრამ ავირჩიე, რომ ვყოფილიყავი პროპორციული, - ამის შესახებ აშშ-ის პრეზიდენტმა, ჯო ბაიდენმა განაცხადა.
მისი თქმით, თუ რუსეთი გააგრძელებს ქვეყნის დემოკრატიაში ჩარევას, მზად არის საპასუხო ზომებისთვის.
„გასულ კვირას ვესაუბრე პუტინს ჩვენი ქვეყნების ურთიერთობის შესახებ. ეს იყო პატივისცემაზე დაფუძნებული დიალოგი. ჩვენ ვერ მივცემთ უცხო ძალას საშუალებას, ჩაერიოს ჩვენს არჩევნებში და ეს ვერ დარჩება დაუსჯელი. მე მას ვუთხარი, თუ აღმოჩნდება, რომ ყველაფერი ისე იყო, როგორც ვფიქრობ, რომ იყო ჩარევა ჩვენს არჩევნებში, ეს პასუხგაუცემელი არ დარჩებოდა, – აღნიშნა ჯო ბაიდენმა.
მან განაცხადა, რომ ხელი მოაწერა რუსეთის წინააღმდეგ ახალი სანქციების შემოღების ბრძანებას და დასძინა, რომ შესაძლებელი იყო ეს სანქციები უფრო მკაცრი ყოფილიყო, თუმცა მან ეს გზა არ აირჩია.
„ნათლად ვუთხარი პრეზიდენტ პუტინს, რომ ჩვენ უფრო შორს წასვლაც შეგვეძლო, მაგრამ მე ეს არ ავირჩიე. ავირჩიე, რომ ვყოფილიყავი პროპორციული. ამერიკა არ ცდილობს რუსეთთან სიტუაციის ესკალაციას და კონფლიქტს. ჩვენ გვინდა სტაბილური დაცული ურთიერთობა. თუ რუსეთი გააგრძელებს ჩვენს დემოკრატიაში ჩარევას, მზად ვარ საპასუხო ზომების გასატარებლად. ეს ჩემი, როგორც ამერიკის პრეზიდენტის მოვალეობაა“, – განაცხადა ჯო ბაიდენმა.
შეერთებული შტატების პრეზიდენტმა, ჯო ბაიდენმა ხელი მოაწერა აღმასრულებელ განკარგულებას, რითაც სანქციების ახალი პაკეტი დამტკიცდა რუსეთის ფედერაციის წინააღმდეგ, ამერიკის არჩევნებში ჩარევის მცდელობისა და სამთავრობო სტურუქტურებზე მასშტაბური კიბერთავდასმის გამო.
სანქცირებულთა სიაში შედის 32 ფიზიკური და იურიდიულ პირი.
გარდა ამისა, შეერთებულმა შტატებმა 10 რუსი დიპლომატი გააძევა.