დღეს ინდივიდუალური გამრიცხველიანების სამუშაოები დაიწყო აჭარაში სოფელ ანგისაში, სადაც გამრიცხველიანდება 433 აბონენტი. პროექტის ღირებულება შეადგენს 129 900 ლარს. სამუშაოების დაწყება, ენერგო-პრო ჯორჯია-ს წარმომადგენლებთან ერთად ბათუმის მერმა რობერტ ჩხაიძემ დაათვალიერა.
პარალელურად გამრიცხველიანების პროცესი საქართველოს სხვა რეგიონებთან ერთად, აქტიურად მიმდინარეობს აჭარის სხვა სოფლებშიც: ადლია, მახინჯაური, მახვილაური, მეჯინისწყალი, შარაბიძეები, ზანაქიძეები და დაბა ხელვაჩაურის ცენტრი.
ინდივიდუალური გამრიცხველიანება არ გულისხმობს აბონენტებისთვის მხოლოდ მრიცხველის მონტაჟს; ეს პროცესი მოიცავს ქსელის მასშტაბურ რეაბილიტაციას, რომლის ფარგლებშიც მთლიანად იცვლება ამორტიზირებული კაბელები ახალი სადენებით, ძველი ხის ბოძები - ახალი რკინაბეტონის ბოძებით, რემონტდება სატრანსფორმატორო პუნქტები და მნიშვნელოვნად უმჯობესდება ქსელის ინფრასტრუქტურა.
ამ დროისთვის ენერგო პრო ჯორჯიამ ქვეყნის მასშტაბით, უკვე გაამრიცხველიანა 11 სოფელი; ხოლო წლის ბოლომდე კიდევ გაამრიცხველიანებს 120 სოფელს და დასახლებულ პუნქტს. საერთო ჯამში ენერგო-პრო ჯორჯიას მიერ ინდივიდუალურად გამრიცხველიანებული აბონენტების რაოდენობა ქალაქების ჩათვლით შეადგენს 360 000 აბონენტზე მეტს. საქართველოს რეგიონების ინდივიდუალური გამრიცხველიანება დასრულდება 2013 წელს.