8 ნოემბრამდე ქობულეთის ტურისტულ ზონაში ასაშენებელი სასტუმროების პროექტები დამტკიცდება და საბოლოო ინვესტორევიც გამოვლინდება.
როგორც სააგენტო "ჯი-ეიჩ-ენისათვის" გახდა ცნობილი, ქობულეთის ტურისტულ ზონაში სასტუმროსების მშენებლობისათვის 52 განაცხადი შევიდა, რომელთა პროექტებსა და საინვესტიციო წინადადებებს სამთავრობო კომისია 8 ნემბრამდე განიხილავს და დაამტკიცებს კიდეც.
ქართული კომპანიების გარდა ქობულეთის ტურისტულ ზონაში სასტუმროების აშენების სურვილი ირანულმა, რუსულმა, სომხურმა, ბელორუსულმა და ესტონურმა კომპანიებმა გამოთქეს.
შეგახსენებთ, რომ ქობულეთში "თავისუფალი ტურისტული ზონის" განვითარების მიზნით, ე.წ "ფიჭვნარის" ტერიტორიზე, ზღვიდან 140 მ-ის დაშორებით, ახალი სასტუმროების მშენებლბისთვის მთავრობამ პოტენციურ ინვესტორებს განსხვავებული შეღავათები შესთავაზა.
პროექტის თანახმად, ე.წ "ფიჭვნარის" ტერიტორიზე, გამოყოფილია მიწის 3 ნაკვეთი (საერთო ფართით 11,3 ჰა), რომლებზედაც დაგეგმილია 27 სასტუმრო კორპუსის მშენებლობა. განსაზღვრულია სასტუმრო კორპუსების 3 ტიპი. მშენებლობის მსურველს შეუძლია არჩევანი გააკეთოს.
ასევე, განსაზღვრულია, სასტუმრო კორპუსების სართულიანობაც: 5, 6 ან 7 სართული (42, 52 ან 60 ნომერი).
პროექტის თანახმად, სამშენებლო მიწის ნაკვეთის განკარგვა განხორციელდება სიმბოლურ ფასად, დამტკიცებული საპროექტო-სამშენებლო დოკუმენტაცია დამკვეთს გადაეცემა უსასყიდლოდ. ტერიტორია უზრუნველყოფილი იქნება საინჟინრო-კომუნალური ქსელებით და სათანადო ინფრასტრუქტურით.
იმ შემთხვევაში, თუ მშენებლობა დამთავრდება და ობიექტი ექსპლუატაციაში შევა 2011 წლის 1 აგვისტომდე, ინვესტორი 15 წლით მოგებისა და ქონების გადასახადებისაგან გათავისუფლდება.
