კემბრიჯის ჰერცოგი, პრინცი უილიამი პრინცი უილიამი კატეგორიულად უარყოფს რასიზმთან დაკავშირებულ ბრალდებებს.
პრინცი უილიამის განცხადებით, სამეფო ოჯახი ნამდვილად არ არის რასისტული. ამ კომენტარით პრინცი უილიამი სასექსის ჰერცოგ ჰარისა და ჰერცოგინია მეგან მარკლის ინტერვიუს გამოეხმაურა.
მისივე თქმით, მას ინტერვიუს გასვლის შემდეგ თავის ძმასთან არ უსაუბრია, თუმცა უახლოეს მომავალში გეგმავს.
მანამდე პრინცი ჰარისა და მეგან მარკლის მიერ გამოთქმულ რასიზმთან დაკავშირებულ ბრალდებებს მოკლე განცხადებით გამოეხმაურა ბუკინგემის სასახლე.
სამეფო კარის განცხადებით, ინტერვიუს დროს წამოჭრილი საკითხები შემაშფოთებელია და მას სერიოზულად ეკიდებიან.
"მთელი ოჯახი დამწუხრებულია იმის შეტყობით, თუ რაოდენ რთული იყო ჰარისა და მეგანის ბოლო წლები. წამოჭრილი საკითხები, განსაკუთრებით კი რასიზმთან დაკავშირებული, შემაშფოთებელია. მიუხედავად იმისა, რომ ზოგიერთი მოგონება შესაძლოა განსხვავებული იყოს, ჩვენ ძალზედ სერიოზულად ვეკიდებით და მას პასუხი გაეცემა ოჯახის მიერ პირადად. ჰარი, მეგანი და არჩი ყოველთვის იქნებიან ოჯახის საყვარელი შვილები", - ნათქვამია სამეფო კარის განცხადებაში.
8 მარტს, ტელეკომპანია CBS-მა პრინც ჰარისა და მეგან მარკლის ინტერვიუ გამოაქვეყნა, სადაც ჰერცოგი და ჰერცოგინია სამეფო ოჯახში არსებულ მდგომარეობაზე საუბრობდნენ.
მეგან მარკლის განცხადებით, მის ვაჟს, არჩის, რომელიც ახლა უკვე ერთი წლისაა, სამეფო კარმა უარი უთხრა პრინცის წოდების მინიჭებაზე, რადგან სამეფო ოჯახში ბავშვის დაბადებისას არსებობდა შეშფოთება იმის შესახებ, რამდენად მუქი შეიძლებოდა ყოფილიყო მისი კანის ფერი.
მოგვიანებით, ოპრა უინფრიმ განმარტა, რომ არჩის კანის ფერთან დაკავშირებული შენიშვნები არ ეკუთვნოდა დედოფალსა და მის მეუღლეს.
ჰარიმ და მეგანმა 2018 წლის მაისში იქორწინეს. ქორწინების დღეს, ელისაბედ მეორემ ახალგაზრდებს სასექსის ჰერცოგისა და ჰერცოგინიას ტიტულები უბოძა.
2020 წელს პრინცმა ჰარიმ და მისმა ცოლმა განაცხადეს, რომ სამეფო ოჯახის წევრების სტატუსზე უარს ამბობდნენ. შედეგად მათ ჩამოერთვათ "სამეფო უდიდებულესობის" ტიტული. დედოფალმა მათ ერთწლიანი ვადა მისცა საბოლოო გადაწყვეტილების მისაღებად. ამ წლის თებერვალში სასექსის ჰერცოგმა და ჰერცოგინიამ დაადასტურეს, რომ არ აპირებენ სამეფო მოვალეობების შესრულებას.
