პრინც ჰარის მეუღლე მეგან მარკლი ამბობს, რომ ვიდრე წყვილი სამეფო მოვალეობების შესრულებაზე უარის თქმის გადაწყვეტილებას მიიღებდა, მას თვითმკვლელობაზე ფიქრები არ ასვენებდა.
"უბრალოდ, სიცოცხლე აღარ მინდოდა. ეს იყო ძალიან მკაფიო, რეალური და საშიში ფიქრები", - განაცხადა მარკლმა CBS-ის ეთერში ოპრა უინფრისთან ინტერვიუში.
მან აღნიშნა, რომ "რცხვენოდა ამის აღიარება ქმართან, თუმცა ესმოდა, რომ "თუ არ გამოუტყდებოდა, ამას გაკეთებდა". მეგანმა თქვა, რომ როდესაც სამეფო ოჯახის წევრებს უთხრა, რომ მას ვიღაცის დახმარება ესაჭიროებოდა, ამის უფლება არ მისცეს, რადგან მსგავსი ქმედება ოჯახს კარგს არაფერს მოუტანდა.
ინტერვიუში მარკლმა ბრიტანეთის სამეფო ოჯახს მძიმე ბრალდებები წაუყენა - მათ შორის, რასიზმი. მეგანის მამა თეთრკანიანია, დედა კი - შავკანიანი, ამიტომ, ის ამბობს, რომ მისი და ჰარის შვილის კანის ფერი სასახლეს აშფოთებდა.
მეგან მარკლის განცხადებით, მის ვაჟს, არჩის, რომელიც ახლა უკვე ერთი წლისაა, სამეფო კარმა უარი უთხრა პრინცის წოდების მინიჭებაზე, რადგან სამეფო ოჯახში ბავშვის დაბადებისას არსებობდა შეშფოთება იმის შესახებ, რამდენად მუქი შეიძლება, რომ ყოფილიყო მისი კანის ფერი.
ინტერვიუს დროს პრინცმა ჰარიმ განაცხადა, რომ მან და მეგანმა ყველაფერი გააკეთეს იმისთვის, რომ სამეფო ოჯახში დარჩენილიყვნენ. მან ასევე არ დამალა მამასთან, პრინც ჩარლზთან ურთიერთობებში არსებული პრობლემებიც.
"თავს ვგრძნობ იმედგაცრუებულად, რადგან მან იგივე გზა გაიარა. მან იცის, რა არის ტიკივილი. მე ის ყოველთვის მეყვარება, მაგრამ მოხდა ძალიან ბევრი ცუდი რამ", - თქვა ჰარიმ.
ჰარიმ ასევე აღნიშნა, რომ პრინც ჩარლზთან ურთიერთობები მის მიერ სამეფო მოვალეობებზე უარის თქმის შემდეგ გართულდა. მისი თქმით, მამა და ძმა - პრინცი უილიამი თავიანთი როლების ხაფანგში მოყვნენ და გათავისუფლება აღარ შეუძლიათ.
ჰარიმ და მეგანმა 2018 წლის მაისში იქორწინეს. ქორწინების დღეს, ელისაბედ მეორემ ახალგაზრდებს სასექსის ჰერცოგისა და ჰერცოგინიას ტიტულები უბოძა.
2020 წელს პრინცმა ჰარიმ და მისმა ცოლმა განაცხადეს, რომ სამეფო ოჯახის წევრების სტატუსზე უარს ამბობდნენ. შედეგად მათ ჩამოერთვათ „მათი სამეფო უდიდებულესობის“ ტიტული. დედოფალმა მათ ერთწლიანი ვადა მისცა საბოლოო გადაწყვეტილების მისაღებად. ამ წლის თებერვალში სასექსის ჰერცოგმა და ჰერცოგინიამ დაადასტურეს, რომ არ აპირებენ სამეფო მოვალეობების შესრულებას.
