ჯანმრთელობის მსოფლიო ორგანიზაციის საგანგებო პროგრამების აღმასრულებელი დირექტორი, მაიკ რაიანი აცხადებს, რომ ნაადრევი და არარეალურია იმის თქმა, რომ პანდემია 2021 წლის ბოლომდე დასრულდება.
მისი თქმით, COVID-19-ის საწინააღმდეგო ვაქცინამ შესაძლოა შეამციროს ვირუსით გამოწვეული ჰოსპიტალიზაციისა და გარდაცვალების რიცხვი.
"ძალიან ნაადრევი და არარეალურია იმის თქმა, რომ ამ ვირუსის დასრულებას წლის ბოლომდე შევძლებთ, მაგრამ ვფიქრობ, რომ თუ გონივრულად მოვიქცევით, შევძლებთ ჰოსპიტალიზაციის, გარდაცვალებისა და პანდემიასთან დაკავშირებული ტრაგედიის დასრულებას", - აღნიშნა მაიკ რაიანმა.
ჯანმრთელობის მსოფლიო ორგანიზაციის მონაცემებით, გასულ კვირას მსოფლიოში კორონავირუსული ინფექციის ახალი შემთხვევების რიცხვი კვლავ გაიზარდა, ბოლო თვენახევრის განმავლობაში ინფიცირების მაჩვენებელი დაბლა იწევდა.
ჯანმო-ს გენერალურმა დირექტორმა ტედროს ადჰანომ ღებრეიესუსმა აღნიშნა, რომ შემთხვევების ზრდა "იმედგამაცრუებელია, მაგრამ გასაკვირი არ არის" და მოუწოდა ქვეყნებს, არ მოადუნონ ძალისხმევა ინფექციის გავრცელების თავიდან ასაცილებლად.
