ამერიკის შეერთებული შტატებში კორონავირუსით გარდაცვლილთა რიცხვი ნახევარ მილიონს უახლოვდება.
შეერთებული შტატების პრეზიდენტის, ჯო ბაიდენის განკარგულებით, ფედერალურ შენობებზე სახელმწიფო დროშები 5 დღის განმავლობაში ნახევრად დაშვებული იქნება, ნიშნად იმ ამერიკელთა ხსოვნის პატივისცემისა, რომლებიც კორონავირუსის პანდემიას ემსხვერპლნენ.
ამ გადაწყვეტილების შესახებ თეთრი სახლის პრესსპიკერმა ჯენ ფსაკიმ განუცხადა თეთრ სახლში შეკრებილ რეპორტიორებს.
"დღეს, მოგვიანებით პრეზიდენტი, პირველი ლედი, ვიცე-პრეზიდენტი და მეორე ჯენტლმენი პატივს მიაგებენ იმ 500 ათასამდე ამერიკელს, რომელიც კორონავირუსს ემსხვერპლა. ისინი მოუწოდებენ ყველა ამერიკელს, რომ წუთიერი დუმილით პატივი მიაგონ დაღუპულთა ხსოვნას", - განაცხადა ფსაკიმ.
ჯონს ჰოპკინსის უნივერისტეტის მონაცემებით, პანდემიის დაწყებიდან დღემდე, აშშ-ში კორონავირუსს 499 309 ადამიანი ემსხვერპლა.
