ლიეტუვის სეიმის საგარეო საქმეთა კომიტეტის თავმჯდომარე ჟიგიმანტას პავილიონისი შეერთებული შტატების სახელმწიფო მდივან ენტონი ბლინკენს მოუწოდებს, ყურადღება მიაპყროს ნიკა მელიას მიმართ ჩადენილ შესაძლო ქმედებებს. ამის შესახებ პავილიონისი სოციალურ ქსელში წერს.
"დღეს ყველა პოლიტიკურმა პარტიამ (გარდა ქართული ოცნებისა) დიალოგის დაწყების მზაობა გამოთქვა. ბატონო ბლინკენ, დემოკრატიული სახელმწიფოების ტრანსატლანტიკურმა საზოგადოებამ ყურადღება უნდა გაამახვილოს ნიკა მელიას მიმართ აგრესიულ და ავტოკრატიულ ტონსა და შესაძლო ქმედებებზე". - წერს პავილიონისი.
საქართველოში 3-დღიანი ვიზიტის ფარგლებში, ჟიგიმანტას პავილიონისი შეხვდა ნაციონალური მოძრაობის ლიდერებს, ოპოზიციისა და ხელისუფლების, ასევე არასამთავრობო ორგანზიაციების წარმომადგენლებს.
ლიეტუველმა პოლიტიკოსმა მოუწოდა საქართველოს ხელისუფლებას, შეწყდეს პოლიტიკური დევნა და დაიწყოს მოლაპარაკებები ოპოზიციასთან.
