შეერთებული შტატების კონგრესის წარმომადგენელთა პალატის საგარეო კომიტეტის თავმჯდომარე, დემოკრატი გრეგორი მიკსი და ამავე კომიტეტის წამყვანი რესპუბლიკელი წევრი, მაიკლ მაკკოლი საქართველოში არსებულ პოლიტიკურ ვითარებასთან დაკავშირებით ერთობლივ განცხადებას ავრცელებენ.
კონგრესმენები პოლიტიკურ მხარეებს დიალოგისკენ და დემოკრატიის პრინციპების განუხრელი პატივისცემისკენ მოუწოდებენ.
"თბილისში არსებული პოლიტიკური დაძაბულობის ესკალაცია ძირს უთხრის და დესტაბილიზაციის საფრთხეს უქმნის იმ დემოკრატიულ პროგრესს, რომლისთვისაც ქართველმა ხალხმა ასე ძლიერ იბრძოლა. ჩვენ მოვუწოდებთ ყველა მხარეს პატივი სცენ დემოკრატიულ პრინციპებს და მელიას საქმის გარშემო განვითარებული მოვლენების მშვიდობიან გადაწყვეტისათვის ჩაერთონ კონსტრუქციულ დიალოგში. ძლიერი და მტკიცე ქართული დემოკრატია, რომელიც პატივს სცემს კანონის უზენაესობასა და მრავალპარტიულ სისტემას, კრიტიკულად მნიშვნელოვანია როგორც საქართველოს, ასევე რეგიონული სტაბილურობისთვის", - ვკითხულობთ განცხადებაში.
მანამდე საქართველოში მიმდინარე პოლიტიკურ მოვლენებთან დაკავშირებით განცხადება გაავრცელეს სენატის საგარეო საქმეთა კომიტეტის ევროპის საკითხთა ქვემოკიტეტის თავმჯდომარემ, დემოკრატმა სენატორმა ჯინ შაჰინმა და საგარეო საქმეთა კომიტეტის წამყვანმა რესპუბლიკელმა სენატორმა ჯიმ რიშმა.
სენატორების განცხადებით, საქართველოში პოლიტიკური დევნა და დაკავებები უნდა დასრულდეს.
"ღრმა შეშფოთებას იწვევს საქართველოში ბოლო დროს განვითარებული მოვლენები. ქართველი ხალხი იმსახურებს კანონის უზენაესობას, დემოკრატიას, სამართლიან და დამოუკიდებელ სასამართლოს. ბოლო რამდენიმე წლის განმავლობაში, ხელისუფლების მაღალი თანამდებობის პირებთან არაერთხელ გაგვიმახვილებია ყურადღება პოლიტიკურ დევნაზე. მიუხედავად იმისა, რომ გვახარებს ნიკა მელიას დაპატიმრების გაუქმების გადაწყვეტილება, მსგავს პოლიტიკურ დევნასა და დაკავებებს საქართველოში ადგილი აღარ უნდა ჰქონდეს. ახლა კი ყველა პოლიტიკური მოთამაშე უნდა დაუბრუნდეს მოლაპარაკებების მაგიდას და იზრუნოს პოლიტიკური ვითარების დეესკალაციისთვის. ვიმედოვნებთ, პოლიტიკური კრიზისი სწრაფად და მშვიდობიანად დასრულდება", - აღნიშნულია განცხადებაში.
