"ერთიანი ნაციონალური მოძრაობის" თავმჯდომარე ნიკა მელია ალეკო ელისაშვილის განცხადებას გამოეხმაურა, სადაც ის ამბობს, რომ მზად არის მისი ხელფასით ნიკა მელიას გირაო გადაიხადოს.
მელიას თქმით, ვინც მის ნაცვლად გირაოს გადაიხდის, სუს-ის აგენტი და გავრილოვის მხარდამჭერი იქნება.
"ჩემი ფეხით არ მომიყვანო ალეკო ეხლა მაგ პარლამენტში იცოდე. ჩემი ხელით გამოგიყვან იმ პარლამენტიდან, აი აგიღებ და გამოგიტან გარეთ, მართლა არ მომიყვანო... რა შენი ხელფასიდან გადამიხდი", - განაცხადა ნიკა მელიამ.
შეგახსენებთ, საქართველოს პარლამენტის იურიდიულ საკითხთა და საპროცედურო საკითხთა კომიტეტების გაერთიანებულ სხდომაზე მხარი დაუჭირეს ნიკა მელიასთვის იმუნიტეტის შეჩერების საკითხს.
იურიდიული კომიტეტის წევრთაგან გადაწყვეტილებას მხარი არ დაუჭირა მხოლოდ "მოქალაქეების" წევრმა, ლევან იოსელიანმა. ხოლო საპროცედურო საკითხთა კომიტეტის წევრებმა ერთხმად დაუჭირეს მხარი მელიასთვის იმუნიტეტის შეჩერებას.
ახლა უკვე ნიკა მელიას იმუნიტეტის შეჩერების საკითხს კენჭი პარლამენტის პლენარულ სხდომაზე უნდა ეყაროს.
საპარლამენტო კომიტეტებში "ნაციონალური მოძრაობის" თავმჯდომარის, ნიკა მელიასთვის პარლამენტის წევრის უფლებამოსილების შეჩერებას განიხილავენ.
საკითხს მოგვიანებით პლენარულ სხდომაზე ეყრება კენჭი.
პროკურატურა ნიკა მელიას 20-21 ივნისის საქმეზე ჯგუფური ძალადობის ხელმძღვანელობას და მასში მონაწილეობას ედავება. 2019 წლის 27 ივნისის განჩინებით, მელიას აღკვეთის ღონისძიების სახით შეეფარდა გირაო 30 000 ლარი და დამატებით შემზღუდავი ღონისძიებები, მათ შორის, ელექტრონული მონიტორინგი.
გასული წლის 1-ელ ნოემბერს, საპროტესტო აქციაზე ნიკა მელიამ სამაჯური მოიხსნა და გადააგდო.
თბილისის საქალაქო სასამართლოს 2020 წლის 3 ნოემბრის გადაწყვეტილებით, მელიას მიმართ აღკვეთის ღონისძიება გამკაცრდა და გირაოს ოდენობა გაიზარდა 40 000 ლარამდე. მელია სწორედ ამ გირაოს გადახდას არ აპირებს. პროკურატურამ პარლამენტს ნიკა მელიასთვის სადეპუტატო იმუნიტეტის მოხსნისთვის მიმართა.
საპარლამენტო უმრავლესობამ განაცხადა, რომ ისინი მზად არის ნიკა მელიას სადეპუტატო იმუნიტეტი მოუხსნან.
