ირანში ისლამური რევოლუციის 42-ე წლისთავს აღნიშნავენ.
კორონავირუსის პანდემიის გამო ირანში მასობრივი შეკრებები შეზღუდულია, ამიტომ მოსახლეობა საზეიმო მსვლელობას ავტომანქანებითა და მოტოციკლებით შეუერთდა.
ავტომანქანები და მოტოციკლები მორთული იყო ირანის დროშებითა და აიათოლა ხომეინისა და შარშან, ბაღდადში მოკლული გენერალ ყასემ სოლეიმანის ფოტოებით.
საზეიმო მსვლელობის შემდეგ, ავტომანქანები და მოტოციკლები თეირანის მთავარ, აზადის მოედნისკენ გაეშურნენ, სადაც მათ სიტყვით მიმართა ირანის პრეზიდენტმა ჰასან როჰანიმ. პრეზიდენტის სიტყვა ვიდეოკონფერენციის რეჟიმში გადაიცემოდა.
ისლამური რევოლუციის წლისთავის აღნიშვნა 1 თებერვალს იწყება, ამ დღეს 1979 წელს, ისლამური რევოლუციის ლიდერი აიათოლა ხომეინი თეირანში პარიზიდან 15-წლიანი დევნილობის შემდეგ ჩავიდა. ოდნავ მოგვიანებით კი, 11 თებერვალს ირანში შაჰის მმართველობა დაემხო.
1979 წლის ირანის ისლამურ რევოლუციამდე, ქვეყანას ათწლეულების განმავლობაში მართავდა შაჰი მოჰამედ რეზა ფეჰლევი.
მიუხედავად იმისა, რომ შაჰის მმართველობა დიქტატორულ ნიშნებს შეიცავდა, მან მოახერხა ქვეყნის ვესტერნიზაციის გზაზე დაყენება, მოდერნიზება და გარკვეულწილად კულტურული თავისუფლების მოპოვება.
შაჰის მმართველობის ჟამს, ირანის ეკონომიკა და საგანმანთლებლო შესაძლებლობები გაიზარდა. თუმცა შაჰის ავტორიტარულმა ქმედებებმა, ფუფუნებისკენ უსაზღვრო სწრაფვამ, საბოლოო ჯამში ხელი შეუწყო ქვეყანაში ისლამური რევოლუციის პროვოცირებას.
