საქართველოში ჩატარებული მუნიციპალური არჩევნები და პირველად ქალაქის მერის პირდაპირი წესით არჩევა იყო აშკარა პროგრესი ევროპულ სტანდარტებთან მიახლოების თვალსაზრისით - ნათქვამია სპეციალურ ანგარიშში, რომელიც ევროსაბჭოს ე.წ. რეგიონული და ადგილობრივი კონგრესის წარმომადგენლებმა საქართველოში 2010 წლის 30 მაისს ჩატარებულ არჩევნებთან დაკავშირებით მოამზადეს.
ორგანიზაციის ოფიციალურ ვებ-გვერდზე გამოქვეყნებულ დოკუმენტში წერია, რომ საარჩევნო ადმინისტრაციის მიერ ორგანიზებული არჩევნები გამჭვირვალე იყო.
ამასთან საარჩევნო კამპანია მოიცავდა ჯანსაღ კონკურენციას. ანგარიშის თანახმად წინა არჩევნებთან შედარებით ბევრად გაუმჯობესებული იყო ამომრჩეველთა სიები, საარჩევნო პროცესმა კი ძირითადად მშვიდ ვითარებაში ჩაიარა.
ევროსაბჭოს წარმომადგენელთა შეფასებით, არჩევნების გამჭვირვალობას ხელი შეუწყო ადგილობრივ დამკვირვებელთა დიდმა რაოდენობამაც.
რუსეთს კი ევროსაბჭომ გუბერნატორების პირდაპირი არჩევნების აღდგენისაკენ მოუწოდა.
ორგანიზაციის ვებ-გვერდზე გავრცელებულ პრესრელიზში ასევე ნათქვამია, რომ ევროსაბჭო არასაკმარისად მიიჩნევს რუსეთში კორუფციის შემცირებისა და სიტყვის თავისუფლების უზრუნველყოფისათვის მიღებულ ზომებს.