კვირას, 7 თებერვალს, ბელარუსსა და მსოფლიოს სხვადასხვა ქალაქში ბელარუსის სოლიდარობის აქცია გაიმართა.
საერთაშორისო საზოგადობას სოლიდარობის აქციის გამართვისკენ ბელარუსის ოპოზიციის ლიდერმა, სვიატლანა ციხანოუსკაიამ მოუწოდა.
ბელარუსის სოლიდარობის აქციას შეუერთდა შეერთებული შტატების სახელმწიფო დეპარტამენტი, რომელმაც საგანგებო განცხადება გაავრცელა.
"თქვენ განსაკუთრებული ძალა და გამბედაობა გამოიჩინეთ სასტიკი რეპრესიების წინაშე. მოხარულები ვართ თქვენი გამბედაობით, რომ გსურთ ბელარუსის მომავალი თავად განსაზღვროთ", - აღნიშნულია სახელმწიფო დეპარტამენტის განცხადებაში.
"ბელარუსის მამაცი ხალხი აგრძელებს მშვიდობიან დემონსტრაციას, რათა მათი ხმა გაგონილი იქნეს, მიუხედავად ბელორუსის რეჟიმის მხრიდან სასტიკი რეპრესიებისა. ევროკავშირი მტკიცედ უჭერს მხარს ბელარუსის მოქალაქეებს", - ნათქვამია ევროკავშირის საგარეო ქმედებათა სამსახურის მიერ გავრცელებულ განცხადებაში.
ბელარუსის სოლიდარობის აქციას ასევე შეუერთდნენ გერმანია, ლატვია, ლიეტუვა, უკრაინა, ესტონეთი, კანადა.
სოლიდარობის აქციები გაიმართა როგორც ბელარუსში, ასევე მსოფლიოს სხვადასხვა ქალაქში, მათ შორის, ბუდაპეშტში, მოსკოვში, ფრანკფურტში, ბონში, თელ ავივში, ვარშავაში, ოსლოში.
საპროტესტო აქციები ბელარუსში გასული წლის 9 აგვისტოს შემდეგ მიმდინარეობს. მოსახლეობა აპროტესტებს გაყალბებული არჩევნების შედეგებს, რომლის მიხედვითაც პრეზიდენტად კვლავ ალიაქსანდრ ლუკაშეკნა გამოცხადდა.
მოქალაქეები მოითხოვენ გადადგეს ლუკაშენკა და დაინიშნოს ხელახალი სამართლიანი და გამჭვირვალე არჩევნები.
