შეერთებული შტატების პრეზიდენტმა, ჯო ბაიდენმა გერმანიიდან ამერიკული სამხედრო კონტიგენტის მესამედის გაყვანის პროცედურის შეჩერების შესახებ განაცხადა, რომელიც მისმა წინამორბედმა პრეზიდენტმა, დონალდ ტრამპმა წამოიწყო.
ხუთშთაბათს, 4 თებერვალს, სახელმწიფო დეპარტამენტში სიტყვით გამოსვლისას, ბაიდენმა განაცხადა, რომ ამერიკელი სამხედროების გაყვანის პროცესი შეჩერდება მანამ, სანამ აშშ-ის თავდაცვის მდივანი ლოისდ ოსტინი არ მოამზადებს მოხსენებას მსოფლიოში ამერიკელი სამხედროების ყოფნის თაობაზე.
ბაიდენის თქმით, ოსტინი უზრუნველყოფს აშშ-ის სახმედრო ყოფნის შესაბამისობას ამერიკის საგარეო პოლიტიკასა და ეროვნული უსაფრთხოების პრიორიტეტებთან.
2020 წლის ივნისში ტრამპმა განაცხადა, რომ აპირებს გერმანიიდან 12 000 ამერიკელი სამხედროს გაყვანას, რაც მთელი ამერიკული კონტიგენტის მესამედია. ეს გადაწყვეტილება ტრამპმა იმით ახსნა, რომ ბერლინი ძალიან მცირე თანხას გამოყოფს თავდაცვის საჭიროებებისთვის.
ტრამპის ამ განცხადებიდან რამდენიმე კვირაში, იმდროინდელმა თავდაცვის მდივანმა, მარკ ესპერმა განაცხადა, რომ გერმანიიდან აშშ-ის სამხედრო ძალის გაყვანის გეგმა "რაც შეიძლება მალე უნდა განხორციელდეს". მას შემდეგ, ამ მიმართულებით კონკრეტული ნაბიჯი არ გადადგმულა.
