დიდი ბრიტანეთის ვაქცინის საკითხთა მინისტრის, ნადიმ ზაჰავის განცხადებით, ამ დროისთვის, მსოფლიოში კორონავირუსის 4 000 ვარიანტია გავრცელებული.
ამ ვარიანტებს შორის ყველაზე სწრაფად ვრცელდება დიდ ბრიტანეთში, სამხრეთ აფრიკასა და ბრაზილიაში აღმოჩენილი ვირუსის ახალი ვარიანტები. სხვა ვარიანტები ვირუსის თავდაპირველი ვარიანტისგან დიდად არ განსხვავდება.
მინისტრის განცხადებით, ახალმა ვარიანტებმა მსოფლიო ახალი გამოწვევის წინაშე დააყენა, რადგან მნიშვნელოვანია დავრწმუნდეთ იმაში, რომ კორონავირუსის ვაქცინა ახალ ვარიანტებთან მიმართებაშიც ეფექტურია.
მისივე განცხადებით, კორონავირუსის ვაქცინის უმსხვილესი მწარმოებლები - Pfizer-ი, AstraZeneca და Moderna ვაქცინის გაუმჯობესებისთვის მუშაობენ, რათა ახალ ვარიანტებთან მიმართებაშიც სრულყოფილი ეფექტურობა ჰქონდეს.
ჯანდაცვის ექსპერტები მიიჩნევენ, რომ კორონავირუსის ვარიანტებს შორის ყველაზე შემაშფოთებელი დიდ ბრიტანეთში აღმოჩენილი შტამია.
დღეს, აშშ-ის დაავადებათა კონტროლისა და პრევენციის ცენტრის დირექტორმა, როშელ ვალენსკიმ განაცხადა, რომ მონაცემები ცხადყოფს, რომ კორონავირუსის ე.წ. ბრიტანული შტამი უფრო მომაკვდინებელია.
ვალენსკის განცხადებით, ჯერ კიდევ არ არის ჩამოყალიბებული აზრი, თუ როგორ იმუშავებს ვაქცინა ამ ვარიანტების წინააღმდეგ
რამდენიმე კვირის წინ, ბრიტანეთს პრემიერ-მინისტრმა, ბორის ჯონსონმა განაცხადა, რომ ადრეული მტკიცებულებების თანახმად, დიდ ბრიტანეთში აღმოჩენილი კორონავირუსის ახალი შტამი, შესაძლოა, უფრო მეტად მომაკვდინებელი იყოს ვიდრე სხვა შტამები.
კორონავირუსის ახალი შტამი დიდ ბრიტანეთში გასული წლის დეკემბერში აღმოაჩინეს. ამ დროის მონაცემებით, ახალი შტამი მსოფლიოს 50-ზე მეტ ქვეყანაში გამოვლიდა.
