დღეს, 23 იანვარს მთელი რუსეთის მასშტაბით მიმდინარეობს საპროტესტო აქციები კრემლის კრიტიკოსის, ოპოზიციონერ ალექსეი ნავალანის მხარდასაჭერად.
საპროტესტო აქციებისკენ ალექსეი ნავალნიმ ჯერ კიდევ მანამდე მოუწოდა მოსახლეობას, ვიდრეს მას ხიმკის რაიონული სასამართლო 30-დღიან პატიმრობას შეუფარდებდა.
რუსული მედიის ინფორმაციით, შორეული აღმოსავლეთსა და ციმბირის რეგიონებში მიმდინარე აქციები ბოლო ათწლეულის განმავლობაში ყველაზე ხალხმრავალი და მასშტაბურია.
საპროტესტო აქციის მონაწილეები იკრიბებიან დედაქალაქ მოსკოვში, პუშკინის მოედანზე.
ამ დროისთვის, მოედანზე დაახლოებით 1000-მდე ადამიანია შეკრებილი. მომიტინგეები სკანდირებენ "სამშობლოსთვის", "ნავალნისთვის", "თავისუფლება პოლიტპატიმრებს".
პოლიციამ საპროტესტო აქციების მონაწილეთა დაკავება შეკრებიდან მალევე დაიწყო. მოსკოვში დააკავეს ნავალნის შტაბის კოორდინატორი ოლეგ სტეპანოვი. ბოლო ინფორმაციით, მოსკოვის საპროტესტო აქციაზე 40-ზე მეტი ადამიანი დააკავეს.
საპროტესტო აქციები იმართება ქალაქ კურგანში, კურგანის ოლქის ადმინისტრაციულ ცენტრში. მიუხედავად -25-გრადუსიანი ყინვისა, 400-მდე მოქალაქე ქალაქის მთავარ მოედანზე შეიკრიბა. იუწყებიან, რომ აქციის მონაწილეთა უმრავლესობა ახალგაზრდაა, რომლებიც სკანდირებენ "სირცხვილია".
პარალელურად, ქალაქში გაისმის ხელისუფლების მიერ დაორგანიზებული მოწოდებები მეგაფონით - "მასობრივი ღონისძიებების ჩატარება აკრძალულია", "თქვენი მოქმედებები უნებართვოა".
პოლიციამ კურგანის საპროტესტო აქციის რამდენიმე მონაწილე დააკავა.
პეტერბურგში, სადაც სულ ცოტა ხანში უნდა დაიწყოს საპროტესტო აქციის მონაწილეთა შეკრება, პოლიცია და სამხედრო ტექნიკა უკვე მობიიზებულია. გადაკეტილია ტროტუარები.
საპროტესტო აქცია იმართება ვლადივოსტოკში, სადაც თვითმხილველთა ინფორმაციით 3000-მდე ადამიანი შეიკრიბა. მომიტინგეებმა გადაკეტეს ცენტრალური ქუჩა. პოლიციამ 100-ზე მეტი ადამიანი დააკავა.
ძლიერი ყინვის მიუხედავად, საპროტესტო აქცია იმართება ეკატერინბურგში. მედიის ინფორმაციით, აქცია ამ დროისთვის მშვიდ ვითარებაში მიმდინარეობს. ადგილობრივი მედია იუწყება, რომ ქალაქში სულ მცირე 5 ათასი ადამინი შეიკრიბა.
საპროტესტო აქციები რუსეთის არაერთ ქალაქში მიმდინარეობს.
ალექსეი ნავალნი 17 იანვარს მოსკოვის შერემეტევოს აეროპორტში საპასპორტო კონტროლის გავლის დროს, ბერლინიდან ჩამოფრენის შემდეგ დააკავეს.
ალექსეი ნავალნი გასული წლის აგვისტოში მოწამლეს ნერვული აგენტი "ნოვიჩოკით". ის სამკურნალოდ ბერლინში გადაიყვანეს, სადაც ექიმებმა მოახერხეს მისი გადარჩენა. კრემლმა არაერთხელ უარყო რაიმე სახის მონაწილეობა მის მოწამვლაში.